بە بەشداری ئەستێرەی جیهانی ئاهەنگی تیروپشکی مۆندیالی 2026 لە واشنتن دەکرێت

یاریگا –

واشنتن دی سی، پایتەختی ئەمریکا ئامادەکاری بۆ میوانداریکردنی ئاهەنگێکی گەورە بۆ تیروپشکی جامی جیهانی 2026 دەکات.

بڕیارە رێوڕەسمەکە هەینی 5ی ئەم مانگە بە بەشداری چەندین ئەستێرەی گەورەی میدیایی و هونەری بەڕێوەبچێت.

کێڤن هارت، ئەکتەری بەناوبانگی کۆمیدی ئەمریکی و هادی کلووم، میدیاکار و فاشۆن مۆدڵی ئەڵمانی لەگەڵ دانی رامیرێز، ئەکتەری ئەمریکی پێشکەشکاری سەرەکی رێوڕەسمەکە دەبن.

رێوڕەسمەکە چەندین چالاکی جیاوازی تێدا دەکرێت و لەسەر ئاستی هونەرییەوە، ئاندرێیا بۆچێلی، تێنۆر-ی گەورەی ئیتاڵی و نیکۆڵ شێرزینگەر، گۆرانیبێژی ئەمریکی و رۆبی ویڵیامز، گۆرانیبێژی بەناوبانگی بەریتانی بەشداری دەکەن.

رێوڕەسمی تیروپشکی جامی جیهانی 2026 رۆژەڤی سەرەکی ئێستایە، چونکە یەکەمجارە مۆندیالی بەبەشداری 48 وڵات بەڕێوەبچێت و پێشبینیدەکرێت، سەدان ملیۆن کەس بینەری بن.

رێوڕەسمەکە کاتژمێر 19:00 بە کاتی هەولێر (12:00 بە کاتی واشنتن) لە ناوەندی کێنێدی لە واشنتن دەستپێدەکات.

فیفا لەڕێی وێبسایت و چەناڵی فەرمی لە یوتیوب، رێوڕەسمەکە بە خۆڕایی پەخش دەکات و کەناڵەکانی وەکو فۆکس سپۆرت، TSN و بی ئین سپۆرتس رێوڕەسمەکە دەگوازنەوە.