یاریگا –
تۆپی پێی ئیتاڵیا تووشی شۆکێکی گەورە بووەوە، دوای دوورخستنەوە و هەڵوەشاندنەوەی مۆڵەتی یانەیەکی پلەسێ.
یەکێتیی تۆپی پێی ئیتاڵیا بڕیارێکی دەستبەجێ جێبەجێکراوی دەرکرد و یانەی ریمنی کە بەشداری خولی پلەسێی ئیتاڵیا دەکات، لە خولەکە دوورخستەوە و مۆڵەتەکەشی هەڵوەشاندەوە.
رۆژنامەی لا گازێتا دێلۆ سپۆرت بڵاویکردووەتەوە، ریمنی پێشێلکاری گەورەی دارایی و کارگێڕی کردووە و نەیتوانیوە لە وادەی دیاریکراودا، پابەندییەکانی دارایی و کارگێڕی سەرەکی جێبەجێ بکات.
ریمنی نەیتوانیوە دڵنیایی لە دابینکردنی مووچە ئەندامانی یانەکە و بوودجەی بەکاربردن بدات، ئەمەش پێشێلکردنێکی روونی رێساکانی رێکخستنی یەکێتیی تۆپی پێی ئیتاڵیایە.
لەلایەکی دیکەوە، سەرۆکایەتی یانەی ریمنی نەیتوانیوە تەواوی پابەندییەکان بەرامبەر گرێبەستی یاریزان و کارمەندان جێبەجێ بکات.
بەگوێرەی رێساکانی تۆپی پێی ئیتاڵیا، هەر یانەیەک نەتوانێت ئەرکە دارایی و کارگێڕییەکانی جێبەجێ بکات، ئەوا خۆکارانە بەندی هەڵوەشاندنەوەی مۆڵەت جێبەجێ دەکرێت و ئەندامێتی یانەکە لە یەکێتیی تۆپی پێی دەسڕێتەوە.
ئێستا چی دەبێت؟
بەگوێرەی یاساکان، گرێبەستی تەواوی یاریزان، دەستەی راهێنەران و کارگێڕی هەڵدەوەشێتەوە و دەتوانن دەستبەجێ گرێبەست لەگەڵ یانەی دیکە بکەن و چاوەڕێی کردنەوەی دەرگای گواستنەوەکانی زستانە نەکەن.
تەواوی ئەنجامی یانەکە دەسڕێتەوە، بەمەش خاڵی سەرجەم یانەکان کە لە بردنەوە یاخود یەکسانبوون بەرامبەر رێمنی بەدەستهێندراون، هەموو دەسڕێنەوە.
بەمەش گۆڕانکاری گەورە بەسەر ریزبەندی خولی پلەسێ دێت و یانەی ئارێتسۆی پێشەنگ، سێ خاڵی لێکەمدەکرێتەوە و لەگەڵ یانەی رافینیا بە 35 خاڵ دەبنە هاوپێشەنگی خولەکە.
بەگوێرەی خشتەی یارییەکانی ئەم وەرزەی خولی پلەسێ، هەر یانەیەک لە گەڕەکانی داهاتوو رووبەڕووی ریمنی ببێتەوە، بەشێوەیەکی خۆکارانە دەبێتە پشوو و هیچ یارییەک ناکات.
