یاریگا –
فرانكۆ ماستانتۆنۆ ئەو بەهرە ئەرجەنتینییەی ریاڵ مەدرید زیاتر لە 60 ملیۆن یۆرۆی بۆ گواستنه‌وه‌ی خه‌رجكرد ئێستا له‌سه‌ر كورسی یه‌ده‌گه.
ماستانتۆنۆ سه‌ره‌تای وەرزی بە شێوەیەک دەستپێکرد کە کەم کەس پێشبینی دەکرد، بەڵام ئێستا، دوای سەرەتایەکی پرشنگدار، ئەستێرە گەنجەکە لە سێ گرنگترین یاریی وەرزدا لەسەر کورسی یەدەگ دەبینرێتەوە، ئەمەش پرسیاری لەسەر ڕۆڵی لە تیپەکەی چابی ئەلۆنسۆ دروستکردووە.
رۆلی ماستانتونۆ له یارییه‌كانی ریال مه‌درید
رۆژنامه‌ی ماركا ئاشكرایكردووه، سەرەتایەکی خەیاڵی لە بێرنابیۆ ماستانتۆنۆی 18 ساڵ، لە یەکەم ڕۆژی ڕاهێنانەوە متمانەی چابی ئەلۆنسۆی ڕاهێنەری بەدەستهێنا. ئەلۆنسۆ بە خێرایی خستییە پێکهاتەی سەرەکی و لە کۆتایی مانگی ئابدا بووە یاریزانێکی گرنگی تیپەکە.
#Lomásleído | Mastantuono, de extremo a extremo https://t.co/6LeuuJCLB1
— MARCA (@marca) November 1, 2025
ئەو بەهرە ئەرجەنتینییە زۆر بە ئاسانی لەگەڵ باڵی ڕاستی یاریگای بێرنابیۆدا گونجا، وەک ئەوەی ساڵانێک بێت لەوێ یاری بکات، فشاری ناوبانگی وەک گەنجێکی بەهرەمەند و ئەو بڕە پارە زۆرەی بۆی خەرجکرابوو، کاریگەری لەسەری نەبوو. ئەلۆنسۆ ئازادیی تەواوی پێدا تاوه‌كو تواناکانی خۆی نمایش بکات.
یەکەم گۆڵ و چوونە نێو مێژوو دوای چەند یارییەک، ماستانتۆنۆ لە گەڕی شەشەمی لالیگادا بەرامبەر یانەی لێڤانتی یەکەم گۆڵی فەرمی خۆی تۆمارکرد، ئەم گۆڵە ناوی خستە لیستی مێژووی ڕیاڵ مەدریدەوە؛ تەنها سێ یاریزان لە مێژووی یانەکەدا لە تەمەنێکی گەنجتردا گۆڵیان تۆمارکردووەئه‌وانیش ئەلبێرتۆ ڕیڤێرا و ڕائول گۆنزالێس هەردووکیان لە 1995 و ئێندریک دوای نزیکەی سێ دەیە ئه‌و كاره‌ی كرد.
لە پێکهاتەی سەرەکییەوە بۆ کورسی یەدەگ
دوای ئەوەی لە شەش یاریدا چوار جار بە سەرەکی یاریی کرد و کاریگەرییەکی بەرچاوی لەسەر هێرشبەریی تیپەکە هەبوو، وردە وردە ناوی لە پێکهاتەی سەرەکیدا کاڵ بووەوە، هۆکاری ئەمەش قورسبوونی خشتەی یارییەکان و زیادبوونی کێبڕکێ بوو. لە سێ یاریی گرنگی وەرزدا بەرامبەر ئاتلێتیکۆ مەدرید، یۆڤێنتۆس، و بارسێلۆنا، ماستانتۆنۆ یاریزانی سەرەکی نەبوو.
گەڕانەوەی یاریزانە بە ئەزموونەکانی وەک بێلینگهام و کاماڤینگا بۆ ئاستی تەواوی خۆیان، هۆکارێکی تر بوو کە ئەلۆنسۆ پشتی پێ بەستن. هەرچەندە ماستانتۆنۆ لە یاریی دێربی مەدرید کاتێک وەک یەدەگ هاتە ناوەوە ڕووی تیپەکەی گۆڕی، بەڵام لە کلاسیکۆدا دیمەنەکە جیاواز بوو. دوای درەوشانەوەی بێلینگهام، ئەلۆنسۆ بڕیاریدا براهیم دیــاز وەک یەدەگ بەکاربهێنێت و ماستانتۆنۆ هیچ خولەکێکی پێنەدرا.
چاوەڕوانی دەرفەتی داهاتوو
یه‌ده‌ك بوونی ماستانتۆنۆ بە مانای لەدەستدانی متمانە نایەت، ئه‌و لە 17 ساڵیدا بە لێدانێکی ڕاستەوخۆ یاریی سوپەرکلاسیکۆی ئەرجەنتینی بۆ ڕیڤەرپلەیت یەکلایی کردەوە، ئەمەش نیشانەی ئەوەیە کە یاریزانی ساتە قورسەکانە، ئێستا لە تیپێکدا گۆڕانکاری بەشێکی سەرەکیی پلانەکەیەتی، ئەم بەهرە ئەرجەنتینییە چاوەڕێی دەرفەتی داهاتووی دەکات لە یاریی داهاتوو بەرامبەر ڤالێنسیا.
