یاریگا –
یانەی مانچێستەر یونایتد بیر لە گواستنەوەی جۆب بێلینگهامی یاریزانی بروسیا دۆرتمۆند لە گواستنەوەی زستانە بە خواستن دەکاتەوە.
ئەو یاریزانە لە هاوینی 2025 لە سەندەرلاندەوە بە بڕی 27 ملیۆن پاوەند پەیوەندی بە دۆرتمۆندەوە کرد، تەنیا دوو یاری لە سەرەتای ئەم وەرزەی بۆندسلیگا کردووە و کۆی گشتی 167 خولەک یاریی کردووە.
مانچێستەر یونایتد کە هەوڵی بەهێزکردنی هێڵی ناوەڕاستی خۆی دەدات، بەتایبەتی بە لەبەرچاوگرتنی ئاستە ناتەباییەکانی مانوێل ئۆگارتێ و کۆبی مەینوو، هەوڵدەدات لە زستاندا بە خواستن بێلینگهام بگوازێتەوە. روبێن ئامۆریمت راهێنەری پورتوگالی شەیتانە سوورەکانیش ئارەزووی خۆی بۆ گواستنەوەی ئەو یاریزانە لاوە دەربڕی.
هەواڵەکان باس لەوە دەکەن کە بێلینگهام و دۆرتمۆند ناکۆکییان هەیە. دوای ئەوەی جوب لە نیوەی یەکەمی یەکەم یاریدا لەگەڵ دۆرتمۆند گۆڕانکاری پێکرا، باوکی یاریزانەکە لەگەڵ سێباستیان کۆل بەڕێوەبەری وەرزشی یانەکە تووشی دەمەقاڵێ بوو، ئەمەش بووە هۆی ئەوەی هاتنە ژوورەوەی بۆ ژووری جلگۆڕینی لێ قەدەخە بکرێت.
بەگوێڕەی زانیارییەکانی ئێکسپرێس، مانچێستەر یونایتد لە نزیکەوە چاودێری دۆخی بێلینگهام دەکات و ئەگەر دۆخەکە بەردەوام بێت، ئەگەری هەیە ئۆفەرێکی خواستنی پێشکەش بکات. بەڵام هێشتا روون نییە کە ئایا بێلینگهام حەز دەکات زوو دۆرتمۆند بەجێبهێڵێت یان نا.
گواستنەوەی بە خواستن دەرفەت دەدات بە بێلینگهام بۆ گەڕانەوە بۆ خولی پرێمەرلیگ و بەردەوامبوونی لە گەشەسەندنەکانی لە کەشێکی ئاشنادا، هەروەها دەتوانێت ببێتە بژاردەیەکی بەسوود بۆ مانچێستەر یونایتد، چونکە هەوڵدەدات لە نیوەی دووەمی وەرزدا هێڵی ناوەڕاستی خۆی بەهێزتر بکات.
