رۆدریگۆ چارەنووسی خۆی لەگەڵ ریال مەدرید یەکلاییکردەوە

یاریگا –

چارەنووسی رۆدریگۆ لە ریال مەدرید یەکلاییدەبێتەوە، سەرەڕای نەبوونی هیچ دڵنیاییەک.

رۆژنامەی مارکا بڵاویکردووەتەوە، هەموو ئاماژەکان بەرەو مانەوەی رۆدریگۆن لە ریال مەدرید، هەرچەندە دەنگۆی زۆر لەبارەی چوونە دەرەوەی لە یانەکە هەبوو.

بازاڕی گواستنەوەی هاوینە ئێوارەی دووشەممە 1ی سێپتێمبەر/ئەیلوول دادەخرێت و ئەمەش ماوەیەکی زۆر کورتە تاوەکو گواستنەوەیەکی گەورەی وەکو رۆدریگۆ رووبدات.

رۆژنامەکە جەختیکردووەتەوە، رۆدریگۆ ئامادەیە لەپێناو شوێنێکی سەرەکی لە مەدرید بجەنگێت و رەتیدەکاتەوە، رۆدریگۆ لە دوا رۆژەکانی گواستنەوەدا پەیوەندی بە مانچێستەر سیتی بکات.

رۆدریگۆ نیگەرانییەکی زۆری لە کەمی بەشدارییەکانی هەبوو و بەڕوونی ئەم نیگەرانیانەی بە ئاڵۆنسۆ گەیاندبوو. پێدەچێت دوای کۆبوونەوەی لەگەڵ راهێنەری یانەکە، متمانەی بە مانەوە لە یانەکە نوێکردبێتەوە.

لەلایەکی دیکەوە، رۆژنامەکە باسی لایەنێکی دیکەی کەیسی مانەوەی رۆدریگۆی کردووە و پێی وایە، یاریزانە بەڕازیلییەکە تاوەکو یەنایەر/کانوونی دووەمی داهاتوو چاوەڕێ دەکات و لە ئەگەری بوونی بە یاریزانی یەدەک، ئەوا بەر لە مۆندیالی 2026 بڕیارێکی خێرا دەدات و یانەکەی دەگۆڕێت.

گرێبەستی رۆدریگۆ لە هاوینی ساڵی 2028 لە مەدرید بەسەردەچێت و تاوەکو ئێستا 68 گۆڵی لە کۆی 267 یارییدا کردووە.

پێناچێت مانچێستەر سیتی بەبێ دەستبەرداربوون لە ساڤینیۆ توانای گواستنەوەی رۆدریگۆی هەبێت، چونکە سنووری مووچەکان دەبڕێت و ئەمەش کێشە بۆ یاساکانی دارایی خاوێن دروست دەکات.

ئەوەی ئێستا لە ژوورەکانی هونەری مەدرید باس دەکرێت بریتییە لەوەی؛ رۆدریگۆ و ڤینیسیۆس جونیۆر رکابەری لەسەر باڵی چەپ دەکەن، کیلیان ئێمباپێ شوێنی لە سەرەڕم پارێزراوە و براهیم دیاز و فڕانکۆ ماستانتونۆش رکابەری لەسەر باڵی راست دەکەن.