کەمترین گۆڵ لە گێمی دووەمی گەڕی رابردووی خولی نایابی کوردستان تۆمار کراوە

یاریگا –

لە گەڕی رابردووی خولی نایابی کوردستان 15 گۆڵ تۆمار کراو کەمترین رێژەی گۆڵ لە گێمی دووەم کراوە.

لە کۆی حەفت یاریی گەڕی 24ـی خولی نایابی کوردستان 15 گۆڵ تۆمارکرا کە 10 گۆڵ لە گێمی یەکەم و پێنج گۆڵیش لە گێمی دووەم کراوە، کەمترین رێژەی تۆمارکردنی گۆڵە لە گێمی دووەم لە تەواوی یارییەکانی ئەم وەرزەی خولەکە، خێراترین گۆڵی ئەم گەڕەش محەمەد والح لە شەقڵاوە لە خولەکی پێنج بەرامبەر پیشەسازی تۆماریکرد.

چوار گۆڵپارێز لە گەڕی رابردووی خولی نایابی کوردستان کلین شیتیان کردووە، هەریەک لە نیما نەعیمی لە چوارقوڕنە و گەیلان سادق لە هەندرێن و رەوەند عەجیل لە هەولێر و هەڤاڵ بەهادین لە سیروانی نوێ گۆڵیان لێ تۆمار نەکرا و کلین شیتیان لەگەڵ یانەکانیان کرد، گەورەترین سەرکەوتنیش لەم گەڕە دەربەندیخان بەدەستی هێنا کاتێک 3 _ 1 لە دەرەوەی یاریگای خۆی لە برایەتی بردەوە.

لە تەواوی گەڕی 24ـی خولی نایابی کوردستان 41 کارتی رەنگا و رەنگ لەلایەن ناوبژیوانانەوە بەرزکراوەتەوە کە 38 کارتی زەرد و سێ کارتی سوور بووە، پێشمەرگەی هەولێر تاکە یانەیە لەم گەڕە هیچ کارتێکی وەرنەگرتووە و یاریی خاوێنیان  کردووە.