یاریگا –
شێرکۆ کەریم هێرشبەر و ئەستێرەی هەولێر ئەمڕۆ بۆ یارییەکەی بەرامبەر قاسم لە پێکهاتەی سەرەکی تیپەکەی یاریی دەکات.
لە گەڕی 26ـی خولی ئەستێرەکانی عێراق، پێنج شەممە ( 3ـی نیسانی 2025 ) کاتژمێر 6:30ـی ئێوارە هەولێر لە یاریگای فرانسۆهەریری بەرامبەر قاسم یاریی دەکات، بەپێی زانیارییەکانی تۆڕی وەرزشی یاریگا شێرکۆ کەریم هێرشبەری تیپەکە دوای 48 رۆژ دابڕان بەهۆی پێکان ئەمڕۆ جارێکی تر دەگەڕێتەوە پێکهاتەی سەرەکی تیپەکە، شێرکۆ لە یاریی رابردوو بەرامبەر کارەبا لە خولەکی 64ـی یارییەکەوە بەشداریکرد، بۆ یارییەکەش هەولێر لە توانای عەباس یاسین بەهۆی پێکانەوە بێبەش دەبێت و نیاز محەمەد و هیگۆر ڤیدالیش بەشداریکردنیان یەکلانەکراوەتەوە بەهۆی تووشبوونیان بەپێکانێکی سوک.
هەولێر و قاسم 10 یاریی فەرمیان لەگەڵ یەکتر کردووە، هەولێر سێ یاریی براوە بووە و قاسمیش سێ یاریی سەرکەوتنی بەدەست هێناوە و لە چوار یارییشدا یەکسان بوونە، هەولێر 12 گۆڵی تۆمار کردووە و قاسم 10 گۆڵی کردووە، گەورەترین سەرکەوتنی هەولێر لە 5 _ 3 _ 2021 بوو لە قۆناخی دووەمی خولی نایابی عێراق کە 5 _ 1 براوە بوو، گەورەترین سەرکەوتنی قاسم لە قۆناخی یەکەمی ئەم وەرزەی خولی ئەستێرەکانی عێراق بوو کە 4 _ 0 لە هەولێری بردەوە.
لە سێ یاریی رابردوودا هەولێر تووشی شکست هاتووە و بە 32 خاڵ لە ریزبەندی 14ـە دێت، قاسم ئەورزە بە راهێنەرایەتی ئەیمەن حەکیمی سووری ئاستێکی بەرز پێشکەش دەکات و بە 38 خاڵ لە ریزبەندی شەشەمی خولی ئەستێرەکانی عێراق دێت.
