ساختەکاریی کردووە؛ رێگری لە یاریزانێکی کۆتدیڤوار دەکرێت بچێتە کەنەدا
یاریگا –
هێرشبەرەکەی کۆتدیڤوار ناتوانێت بەشداریی لە دووەم یاریی هەڵبژاردەکەی لە قۆناخی کۆمەڵەکانی مۆندیال لە بەرامبەر ئەڵمانیا بکات، کە بڕیارە رۆژی شەممە بەڕێوەبچێت.
تۆڕی ئاتلێتیک بە شێوەیەکی تایبەت ئاشکرای کرد کە ئێلی واهی تەمەن 23 ساڵ، کەمتر لە دوو هەفتە پێش دەستپێکردنی یارییەکانی مۆندیال بە گومانی تێوەگلان لە ساختەکاری لە یارییەکاندا دەستگیر کراوە، ئەگەرچی تاوەکوو ئێستا هیچ تۆمەتێکی فەرمی ئاراستە نەکراوە. واهی لە یەکەم یاریی کۆتدیڤوار کە تێیدا سەرکەوتنیان بەسەر ئیکوادۆر بەدەستهێنا لە فیلادلفیا سەرەکی بوو. یاریی دووەمی هەڵبژاردەکەیان رۆژی شەممە لە تۆرۆنتۆ دەبێت، بەڵام فیدراسیۆنی تۆپی پێی کۆتدیڤوار (FIF) لە بەیاننامەیەکدا دووپاتی کردەوە کە رێگە بەم هێرشبەرە نەدراوە بچێتە نێو خاکی کەنەداوە، بۆیە لە ویلایەتە یەکگرتووەکانی ئەمریکا دەمێنێتەوە و فیدراسیۆنەکەش لە نزیکەوە چاودێریی دۆخەکە دەکات.
دەقی بەیاننامەکەی فیدراسیۆنی تۆپی پێی کۆتدیڤوار:
فیدراسیۆنی تۆپی پێی کۆتدیڤوار ئاگاداریی ئەو بابەت و زانیارییانەیە کە رۆژی چوارشەممە، 17ـی حوزەیرانی 2026، سەبارەت بە یاریزانی نێودەوڵەتیی ئیڤواری ئێلی واهی بڵاوکراونەتەوە. تاوەکوو ئەمڕۆ، فیدراسیۆنەکە بە فەرمی لە هیچ رێکارێکی دادوەری یان کارگێڕی کە پێشتر راگەیاندرابێت و پەیوەندی بەو یاریزانەوە هەبێت ئاگادار نەکراوەتەوە. لەم کاتە زۆر قورسەدا، فیدراسیۆنەکە پاڵپشتیی تەواوی خۆی بۆ یاریزانەکە دەردەبڕێت و ئێلی واهی وەکوو بەشێکی گرنگی تیمی نیشتمانیی کۆتدیڤوار دەمێنێتەوە. هاوکات فیدراسیۆنەکە رادەگەیەنێت کە یاریزانەکە ناتوانێت لەگەڵ شاندەکە گەشت بۆ کەنەدا بکات، چونکە مۆڵەتە کارگێڕییە پێویستەکان بۆ چوونەنێو خاکی کەنەدا لەم قۆناخەدا بەدەست نەهاتوون. بۆیە واهی لە ئەمریکا دەمێنێتەوە تاوەکوو تیمی نیشتمانی دەگەڕێتەوە.
Ivory Coast striker Elye Wahi has been denied entry to Canada for his country’s second World Cup group game against Germany on Saturday.
The Athletic exclusively revealed on Wednesday that Wahi had been arrested on suspicion of fixing offences less than two weeks before the… pic.twitter.com/hIsBonikal
— The Athletic | Football (@TheAthleticFC) June 18, 2026
سەرچاوە ئاگادارەکان کە بە مەرجی نەهێنانی ناویان قسەیان کردووە، دووپاتیان کردووەتەوە کە واهی لەژێر لێکۆڵینەوەیەکی چالاکدایە بۆ دڵنیابوونەوە لەوەی ئایا ئەم هێرشبەرە لە کاتی یاریکردنی بۆ یانەی نیسی فەرەنسی، بە ئەنقەست کارتێکی زەردی لە بەرامبەر مێتز لە 17ـی ئایاردا وەرگرتووە یان نا. ئەو لە 29ـی ئایاردا لەلایەن پۆلیسی فەرەنساوە دەستگیرکرابوو. وتەبێژی نووسینگەی داواکاریی گشتیی مارسیلیا رایگەیاندووە کە یاریزانێکی تەمەن 23 ساڵانی خولی پلە یەکی فەرەنسا لە چوارچێوەی لێکۆڵینەوەیەکدا لەسەر تۆمەتی فێڵکردنی رێکخراو، گەندەڵیی وەرزشیی رێکخراو و سپیکردنەوەی پارە دەستگیرکراوە.
واهی دوای ئازادکردنی لە دەستبەسەریی پۆلیس، رێگەی پێدرابوو گەشت بۆ ئەمریکای باکوور بکات بۆ مۆندیال. بەڵام دوای بڵاوبوونەوەی هەواڵەکە، یەکێتیی خولی پیشەگەریی فەرەنسا (LFP) بەیاننامەیەکی بڵاوکردەوە و تێیدا بوونی رێکاریی یاسایی بەهۆی قەبارەیەکی نائاسایی لە گرەوکردن لەسەر وەرگرتنی کارت لەلایەن ئێلی واهیەوە دووپاتکردەوە. دەستگیرکردنی واهی کەمێک دوای ئەوە هات کە دوو گۆڵی لە بردنەوەیەکدا بەسەر سانت ئێتیاندا کرد، کە یانەی نیسی لە خولی پلە یەکی فەرەنسا هێشتەوە.
واهی دووەم یاریزانە کە رێگری لێدەکرێت بۆ مۆندیالی 2026 بچێتە کەنەداوە، دوای ئەوەی تۆماس پارتی، یاریزانی هێڵی ناوەڕاستی گانا، بە هەمان شێوە قەدەخەکردنی چوونە ناوەوەی بۆ کەنەدا بەسەردا سەپێنرا بۆ یەکەم یاریی هەڵبژاردەکەی لە بەرامبەر پەنەما.
یاریزانەکەی یانەی ڤیاڕیال و پێشووی ئارسناڵ، لە تەممووزی 2025 لەلایەن پۆلیسی لەندەنەوە بە پێنج تۆمەتی دەستدرێژیی سێکسی تۆمەتبار کرابوو و لە ئەیلوولی هەمان ساڵدا رایگەیاندبوو کە بێتاوانە. لە شووباتی ئەمساڵیشدا بە دوو تۆمەتی نوێی دەستدرێژیی تۆمەتبار کرایەوە و لە نیساندا دیسانەوە رەتی کردەوە. بەڵام کاتێک داواکاریی پێشکەش کردبوو بۆ چوونە ناو کەنەدا پێش دەستپێکردنی پاڵەوانییەتییەکە، پارتی لە داواکارییەکەیدا بە درۆ بانگەشەی ئەوەی کردبوو کە لە هیچ وڵاتێکدا رووبەڕووی تۆمەتی تاوانکاریی نەبووەتەوە.
تۆڕە ئەمریکییەکە پەیوەندی بە واهی، کۆتدیڤوار، فیفا و فەرمانگەی کۆچی کەنەداوە کردووە بۆ وەرگرتنی لێدوان، بەڵام هێشتا وەڵام نەدراونەتەوە.
