یاریگا –
یانەی دیالا بڕیاریدا یارییەکانی لە خولی ئەستێرەکانی عێراق لە یاریگای نەورۆز لە سلێمانی بکات.
یانەی دیالا بڕیاریدا بەهۆی ئەوەی چیدیکە یاریگای کوت بۆ یاریی تیاکردن بەردەست نابێت، یارییەکانی داهاتووی لە خولی ئەستیرەکانی عێراق لە یاریگای نەورۆز لە سلێمانی بکات، کە کۆتایی ساڵی رابردوو یاریگا نوێیەکەی نەورۆز کرایەوە و میوانداریی یارییەکانی نەورۆز دەکات.
جگە لە دیالا، لەم وەرزە نەجەف بەهۆی نوێکردنەوەی چیمەنی یاریگاکەی، یارییەکانی لە خولی ئەستێرەکانی عێراق گواستبووەوە یاریگا نوێیەکەی نەورۆز، دیالا دوای نەورۆز و نەجەف دەبێتە سێیەم یانە لە یاریگا نوێیەکەی نەورۆز میوانداریی یارییەکانی تیادا بکات.
یاریگای نێودەوڵەتی نەورۆز ساڵی 2020 بەردی بناخەی دانرا و لەوەتەی ساڵی 2021 کاری تیادا دەکرێت، یاریگاکە شوێنی 15 هەزار هاندەر دەگرێت و 20 ملیۆن دۆلاری تێچووە، گەورەترین یاریگای شاری سلێمانییە و موڵکی یانەی نەورۆزە.
دیالا لەم وەرزەی خولی ئەستێرەکانی عێراق لەکۆی 16 گەڕی رابردوو نەیتوانیوە هیچ بردنەوەیەک بەدەست بهێنێت، تەنیا 6 خاڵی کۆکردووەتەوە و لە پلەی بیستەمی خولەکە دێت، دوای ئەوەی ئەمڕۆ لە گەڕی حەڤدەمین دەبێتە میوانی نەفتی بەسرە، لە گەڕی هەژدەمی خولەکە میوانداریی نەفتی میسان دەکات.
