ریال دەیەوێ بە گواستنەوەی یاریزانێکەوە لە سعودیەوە بگەڕێتەوە بۆ مەدرید
یاریگا –
ریال مەدرید دەیەوێ بەدەستی خاڵی لە سعودیەوە نەگەڕێتەوە بۆ ئیسپانیا، بەڵکو هاوشانی جامی سوپەر دەیەوێ یاریزانێکیش لەو وڵاتەی کەنداو بگوازێتەوە.
یانە شاهانەکە توانی بە بردنەوەی 2-0 لە مایۆرکا خۆی بگەیەنێتە یاریی کۆتایی جامەکە و لەوێ بەرامبەر بارسێلۆنای رکابەریی مێژوویی یاریی دەکات.
بەگوێرەی زانیارییەکانی ماڵپەڕی فیچاخێسی بەناوبانگ، ریال دەیەوێ خواستەکەیان بۆ هێنانی ئێمریک لاپۆرت نوێبکەنەوە و سوود لەو دەرفەتە وەربگرن کە ئێستا لە سعودیەن بۆ گفتوگۆکردن لەسەر گواستنەوەی بەرگریکارە ئیسپانیەکەی ئێستای یانەی نەسڕ.
ریال لە هێڵی بەرگریی قەیرانی هەیە، ئەوە بەتایبەت دوای پێکانی ئیدێر میلیتا و دانی کارڤاخال. ئەمشەویش هەر بەهۆی پێکانەوە ئۆرێلین چوامینی بەناچاری دانیشاند کە لەم وەرزە زۆر جار ئەو یاریزانە فەڕەنسیەی لە دڵی بەرگری تاقیدەکاتەوە.
مەدریدیەکان تازە تواناکانی داڤید ئالابایان بۆ گەڕاوەتەوە، بەڵام زیاتر لە ساڵێکە یاریی نەکردووە، هەربۆیە ناتوانن گرەو لەسەر هەمان ئاستی پێشووی بکەن.
بیرۆکەی گواستنەوەی لاپۆرت وەک چارەسەرێکی خێرا لەم زسرتانەدا دەگەڕێتەوە بۆ ئەو ئەزموونە زۆرەی ئێمریک لە ئەوروپا هەیبوو لە یانەکانی ئاتلێتیک بیلباو و مانچێستەر سیتی. ئەوە و هەروەها کەمیی تێچوونی گواستنەوەکەی لەچاو ئامانجەکانی دیکەی یانە مەدریدیەکە.
🚨 Real Madrid plan to reignite their interest in signing Aymeric Laporte at the Spanish Super Cup in Saudi Arabia.
(Source: Fichajes) pic.twitter.com/3QQhIL1NO2
— Transfer News Live (@DeadlineDayLive) January 9, 2025
