لە مۆندیالی پێشوو باشترە؛ پسپۆڕێکی خۆراکی وەرزشی نهێنیی پشت ئاستە سەرنجڕاکێشەکەی مێسی ئاشکرا دەکات

یاریگا –

لیۆنێل مێسی چاودێرانی سەرسام کردووە بەو ئاستەی لە لێهاتوویی جەستەیی کە لە تەمەنی 39 ساڵیدا نیشانی داوە. ئەمە ئەنجامی بەڕێوەبردنی وردی هەوڵەکانیەتی لە کاتی یارییەکاندا، بەڵام هاوکات بەهۆی ئامادەکارییەکی زۆر ئامانجدارەوەیە، لە کاتێکدا ئەرجەنتین خۆی ئامادە دەکات بۆ رووبەڕووبوونەوەی ئینگلتەرا لە یاریی پێشکۆتایی مۆندیالدا لە رۆژی چوارشەممە (کاتی 10:00ـی شەو بە کاتی هەولێر).

ژمارە پێوانەیییەکان، گۆڵەکان و ساتەکانی درەوشانەوە بوونیان هەیە. پاشان جەستە باریکەکەی و دەرکەوتنی نزیکەی لاوازی لە کۆتایی یارییەکاندا هەیە. لە سەرەتای مۆندیالەوە، مێسی بە دۆخی جەستەیی خۆی زۆر کەسی سەرسام کردووە. بەرامبەر سویسرا لە چارەکی کۆتاییدا (3-1 دوای کاتی زیادکراو)، بۆ ئەو زۆر سەختتر بوو جیاوازی دروست بکات بەهۆی چاودێریی چڕی یاریزانە سویسرییە جەستە بەهێزەکانەوە. سەرەڕای ئەمەش، ئەو تەواوی 120 خولەکەکە بەردەوام بوو و نزیک بوو لە دوورکەوتنەوە لە کاتی زیادکراو بە لێدانێک کە لە کاتی زیادکراوی یارییەکەدا (90+2) بەر ستوونی گۆڵ کەوت.

زۆرجار ئاماژە بەوە کراوە کە کاپتنی ئەرجەنتین چیتر راکردنی خێرای بێ کۆتایی ناکات وەکوو ئەوەی لە سەردەمی زێڕینی خۆیدا دەیکرد. لەبری ئەوە، ئەو وزە دەپارێزێت بە دوورکەوتنەوە لە فشاری بەردەوام و شوێنکەوتنی بەرگری، ئەمەش رێگەی پێدەدات کوشندەتر و یەکلاکەرەوەتر بێت کاتێک دەکەوێتە جووڵەوە. بەڵام ئەمە بە تەنیا دۆخی ئەو روون ناکاتەوە. پسپۆڕی خۆراکی تایبەتی ئەو، ئیسماعیل گالانچۆ، کە تایبەتمەندە لە خۆراکی وەرزشیدا، چەند پێوەرێکی جەستەیی لە پشت شێوازە سەرنجڕاکێشەکەی مێسییەوە ئاشکرا کردووە.

بە بەکارهێنانی ئەو داتایانەی لەلایەن کۆمپانیا تایبەتمەندەکانی شیکاریی وەرزشییەوە پێشکەش کراون، گالانچۆ روونی کردەوە کە لە مۆندیالی 2022، مێسی گەیشتە بەرزترین خێرایی کە 29.38 کیلۆمەتر لە کاتژمێرێکدا بوو، لە کاتێکدا لەم پاڵەوانییەتییەدا ئەو گەیشتووەتە 30.9 کیلۆمەتر لە کاتژمێرێکدا، ئەمەش باشتربوونێک بە رێژەی زیاتر لە 5% نیشان دەدات.

ئەو گوتیشی:

لەنێوان 2009 و 2015، بەرزترین خێرایی لیۆ لە دەوروبەری 32.5–33.5 کیلۆمەتر لە کاتژمێرێکدا بوو و لە هەندێک پێوانەکردنی جیاوازدا ئەو تەنانەت لە 34 کیلۆمەتر لە کاتژمێرێکدا نزیک بووەوە. بە شێوەیەکی ئاسایی، زۆرترین خێرایی دوای تەمەنی 30 ساڵی بە شێوەیەکی بەرچاو کەم دەبێتەوە. وەرزشوانان بە شێوەیەکی ئاسایی 1–2%ـی خێرایی خۆیان لە ساڵێکدا لەنێوان تەمەنی 30 و 35 ساڵیدا لەدەست دەدەن و 1.5–3% لە ساڵێکدا دوای تێپەڕاندنی تەمەنی 35 ساڵی.

گالانچۆ لە کۆتایی قسەکانیدا گوتی:

ئەو بە مانای وشە لەم مۆندیالەدا لە دۆخێکی جەستەیی باشتردایە بەراورد بە مۆندیالی پێشوو، سەرەڕای ئەوەی چوار ساڵ تێپەڕیوە. ئێمە بە وردی چیمان کرد بۆ پێچەوانەکردنەوەی بایۆلۆجییەکەی؟ ناتوانم ئەوە ئاشکرا بکەم، بەڵام من زۆر دڵخۆشم بە ئەنجامەکان، هەروەها بە پابەندبوون و دڵسۆزیی لیۆ لە ماوەی چەند ساڵی رابردوودا.

ئامادەکارییەکی قورستر لەو کاتەوەی خولی ئەمریکی لە مانگی شوباتدا دەستی پێ کردەوە

یەک شت جێگەی دڵنیاییە: تەمەن درێژیی ئەستێرەکەی پێشووی بارسێلۆنا و پاریس سانجێرمان هیچ کات رووی نەدەدا بەبێ گۆڕینی تەواوی خووی خواردنی ساڵانی گەنجییەتیی خۆی. لە کاتێکدا پێشتر بە چێژوەرگرتن لە پیتزا، هۆت دۆگ، گۆشتی سوور و خواردنەوە گازییەکان ناسرابوو، مێسی نزیکەی 15 ساڵ لەمەوبەر بە رێنمایی پسپۆڕی خۆراکی ئیتاڵی، جولیانۆ پۆسەر، پەیڕەوی لە سیستەمێکی خۆراکی تەندروست و هاوسەنگ کرد.

گۆڕانکارییەکە لە سەرەتادا پاڵنەرەکەی کەمتر درێژکردنەوەی ژیانی وەرزشیی بوو بەراورد بە تووشبوونی بەردەوام بە پێکانە ماسوولکەیییەکان و کێشەکانی گەدە کە زۆرجار دەبوونە هۆی رشانەوەی ئەو. ئەمڕۆ، شێوازی ژیانی ئەو بە دەوری خەوتن، کاری بەهێزکردن و چالاککردنی ماسوولکەکاندا دەخولێتەوە، بە پەیڕەوکردنی رۆتینێکی رۆژانەی زۆر تووند کە کەمجار دەیشکێنێت.

بەڵام بۆ گەیشتن بەم مۆندیالە لە باشترین دۆخدا، ئەو پەیڕەوی لە بەرنامەیەکی ئامادەکاریی زۆر سەخت کرد. لە کاتێکدا زۆرێک لە یاریزانانی ئەورووپا بارگرانیی کارەکانی خۆیان لە ماوەی وەرزێکی درێژی یانەکەدا بەڕێوەدەبرد، ئەستێرەکەی ئینتەر مەیامی راهێنانەکانی خۆی چڕتر کردەوە دوای ئەوەی خولی ئەمریکی لە کۆتایی مانگی شووباتدا دەستی پێ کردەوە.

لەگەڵ هاوتیمەکەی لە ئینتەر مەیامی و ئەرجەنتین، رۆدریگۆ دی پۆڵ، مێسی دەستی بە بەرنامەیەکی چڕ کرد کە بۆ دروستکردنی لێهاتوویی جەستەیی بە شێوەیەکی پلەبەپلە پێش مۆندیال داڕێژابوو، لە کاتێکدا قەرەبووی ناڕێکیی ئاستی خولی ئەمریکای باکووری دەکردەوە.

بۆ ماوەی سێ مانگ، هەردوو یاریزانەکە یەکەکانی راهێنانی خۆیان دوو هێندە کرد. سەرەڕای راهێنانەکانی یانەکەیان، ئەوان هەموو رۆژێک بۆ راهێنانی تایبەت لەگەڵ راهێنەرێکی جەستەیی تایبەتدا کۆدەبوونەوە. بەرنامەکەیان بە قورسی سەرنجی لەسەر هێز و کاری ئاستی بەرز بوو، لەگەڵ رێکخستنی وردی بارگرانیی کارەکان بۆ ئامادەکاریی پاڵەوانییەتییەکە. سوودەکان لە کاتی یارییەکانی خولی ئەمریکیدا روون بوون: مێسی لە مانگی ئایاردا پێنج گۆڵی کرد و حەوت ئەسیستی پێشکەش کرد، لە کاتێکدا دی پۆڵ دوو گۆڵی کرد و دوو ئەسیستی پێشکەش کرد.

ئامادەکاریی دروست بۆ ئەو مۆندیالەی کە دەکرێت کۆتا مۆندیالی بێت، بۆ ماوەیەکی درێژ یەکێک بوو لە گەورەترین کارە لە پێشینەکانی براوەی 8 جارەی باڵۆن دۆر. ئەو نەیدەویست بەرگری لە نازناوی جیهانیی ئەرجەنتین بکات بەبێ پێدانی هەموو دەرفەتێکی گونجاو بە خۆی بۆ پێشکەشکردنی باشترین نمایش.

لە کۆتایی مانگی ئایاردا، ئەو تووشی ترسێکی کەم بوو بەهۆی ماندوییەتیی ماسوولکەیی کە بووە هۆی هەستکردن بە ناڕەحەتی. دوای چەند رۆژێک پشوو، ئەو بە هەستکردن بە چاکبوونەوەی تەواو و لە دۆخێکی جەستەیی نایابدا چووە نێو پاڵەوانییەتییەکەوە.

ئاماری هەشت گۆڵی ئەو لە شەش یارییدا ئەم راستییەی بە تەواوی پشتڕاست کردەوە.

سکالۆنی چەند رۆژێک لەمەوبەر گوتی:

لیۆ نزیکەی هەمان بڕ لە یارییەکاندا رادەکات، نە زیاتر و نە کەمتر. بە سەیرکردنی داتاکان، پێم وانییە جیاوازییەکی گەورە هەبێت. بەڵام ئەوەی ئەو دەیکات زۆر یەکلاکەرەوەترە، نازانم ئایا ئەوەت خوێندووەتەوە کە تتێری هێنری گوتی، چونکە لەپاڵ ئەو یاریی کردووە: کاتێک هەست دەکات دەتوانێت مەترسی دروست بکات، ئەو مەکینەیە. ئەو کەسانەی نایناسن پێدەچێت سەرسام بن، بەڵام من بە هیچ شێوەیەک سەرسام نیم کە ئەو لە تەمەنی 39 ساڵیدا بەم شێوازە نمایش پێشکەش دەکات. بە شێوەیەکی سروشتی، رۆژێک دێت کۆتایی پێ دێت، ئەو بۆ هەمیشە یاری ناکات، لە تەمەنی 50 ساڵیشدا هەر بەردەوام نابێت لە یاریکردن، بەڵام تاوەکوو ئەو خۆی بیەوێت، بە باشترین دەمێنێتەوە.

چەند رۆژێکی دیکە لەم ئاستەدا بەس دەبێت بۆ دڵخۆشکردنی مێسی و ئەرجەنتین.