یاریگا –
چارەنووسی یاریکردنی ئێمباپێ لە یاریی کۆتایی جامی کیشوەرەکانی یانەکان یەکلابووەوە.
خۆسیێ فیلێکس دیاز رۆژنامەنووسی بەناوبانگی ئیسپانی لە رۆژنامەی مارکای ئیسپانی ئاشکرایکردووە، کیلیان ئێمباپێ گڵۆپی سەوزی بۆ دەستەی پزیشکی یانەکەی هەڵکردووە و دڵنیای کردوونەتەوە بۆ یاریکردن ئامادەیە و دەیەوێت سبەی چوارشەممە بەرامبەر پاچوکای مەکسیکی یاریی بکات.
فیلێکس دیاز رایگەیاندووە، ئەمڕۆ ئێمباپێ لەم دەوحە لەگەڵ دەستەی پزیشکی یانەکەی قسەی کردووە و پێی راگەیاندوون، لەوپەڕی توانا و وزەدایە و بۆ یارییەکەی سبەی بەرامبەر پاچوکا ئامادەیە، کیلیان بە پزیشکەکانی یانەکەی راگەیاندووە بە تەواوەتی لەو ئازارەی تووشی ببوو، رزگاری بووە کە لە یاریی رابردووی یانەکەی بەرامبەر رایۆ ڤاییکانۆ بێبەش بوو.
ئێمباپێ لە یاریی بەرامبەر ئاتاڵانتا لە چامپیۆنزلیگ لە ماسوڵکەکانی رانی تووشی پێکان بوو، لە یاریی رابردووی یانەکەی دابڕا و پێشبینی دەکرا بۆ ماوەی 10 رۆژ لە یاریگاکان داببڕێت، بەڵام هێرشبەرە فەڕەنسییەکە سوورە لەسەر ئەوەی سبەی لە دەوحە یاریی بکات بۆ ئەوەی دووەم نازناو لەگەڵ ریال مەدرید بباتەوە.
سبەی چوارشەممە کاتژمێر20:00 ریال مەدریدی ئیسپانی و پاچوکای مەکسیکی لە یاریی کۆتایی جامی کیشوەرەکانی یانەکان لە دەوحە لە یاریگای لوسەیل بەیەک دەگەن، کە دوو ساڵ لەمەوبەر ئێمباپێ لەو یاریگایە و لە هەمان رۆژدا لە یاریی کۆتایی مۆندیال بەرامبەر ئەرجەنتین تووشی شکست بوو.
