ئەستێرەی یاریگا؛ محەمەد خەلیل باشترین یاریزانی گەڕی هەشتەمی خولی نایابی کوردستان بوو

یاریگا –

محەمەد خەلیل باشترین یاریزانی گەڕی هەشتەمی خولی نایابی کوردستان بوو، کە تۆڕی وەرزشی یاریگا ئەستێرەی هەر گەڕێکی خولەکە دەستنیشان دەکات.

محەمەد خەلیل یاریزانی یانەی برایەتی باشترین یاریزانی گەڕی هەشتەمی خولی نایابی کوردستان بوو، لە یاریی بەرامبەر شێروانە دوو گۆڵی کرد کە 3-2 لە شێروانە پێشەنگی خولەکەیان بردەوە، محەمەد خەلیل لە خولەکی 25 و 91 هەردوو گۆڵەکەی کرد، کە گۆڵی دووەمی لەکاتی زیادکراوی یارییەکە بوو، بەو گۆڵە کوشندەی بردنەوەی بۆ یانەکەی بەدەستهێنا.

جگە لە محەمەد خەلیل هەریەکە لە سەلام عەبدوڵا هێرشبەری سەیدسادق، نیعمەت عارف هێرشبەری پیشەسازی و محەمەد ئیبراهیم (حەمە رۆناڵدۆ) هێرشبەری رانیە لەم هەفتەیە دووانەیان کرد، بەڵام محەمەد خەلیل بە دووانەکەی سەرکەوتنی بۆ یانەکەی بەدەستهێنا و ئەوانی دیکە یەکسانبوون.

دووەمجارە لەم وەرزە محەمەد خەلیل بە ئەستێرەی یاریگا هەڵدەبژێردرێت، لە گەڕی پێنجەم بەرامبەر پێشمەرگەی هەولێر دوو گۆڵی کرد و بە باشترین یاریزانی گەڕەکە هەڵبژێردرا، کە لەم وەرزە لە 8 یاری 5 گۆڵی کردووە و گۆڵێکی بە لێدانی سزا بووە.

ناوەڕاستکارە 25 ساڵانەکەی برایەتی هاوینی رابردوو لە لە بازاڕی گواستنەوەی هاوینە لە چوارقوڕنەوە پەیوەندی بە ریزەکانی یانەکەی هەولێر کرد، پێشتریش لە ریزی یانەکانی چەمچەماڵ و نەورۆزیش یاریی کردووە.

لە گەڕی هەشتەمی خولی نایابی کوردستان 13 گۆڵ تۆمارکران، کە دوو گۆڵ بە لێدانی سزا تۆمارکران، پێشمەرگەی هەولێر دوای بردنەوەی لە دەربەندیخان بە کۆکردنەوەی 17 خاڵ هاتە پێشەنگی خولەکە، شێروانە دابەزییە پلەی دووەم.