ریال مەدرید چارەنووسی ئاردا گولەری یەکلاکردەوە

یاریگا –

ریال مەدرید چارەنووسی ئاردا گولەری یەکلاکردەوە و ناوەڕاستکارە تورکەکە لە مەدرید دەمێنێتەوە.

فابریزیۆ رۆمانۆ رۆژنامەنووسی ئیتاڵی ئاشکرایکردووە، لە سێ چوار هەفتەی دواییدا ریال مەدرید چەند ئۆفەرێکی بۆ فرۆشتنی ئاردا گولەر پێگەیشتووە، بەڵام سەرجەمیانی رەتکردووەتەوە و ناوەڕاستکارە تورکەکە لە ریال مەدرید دەمێنێتەوە.

فابریزیۆ ئاشکرایکردووە، ریال مەدرید ئامادە نییە بەهیچ شێوەیەک دەستبەرداری گولەر بێت و بە نەخێر وەڵامی سەرجەم ئەو ئۆفەرانەی داوە کە بۆ کڕین یان خواستنی ئاردا پێیگەیشتوون، کە دوو یانە لە دەرەوەی ئیسپانیا داوای گولەر دەکەن.

رۆژنامەنووسە ئیتاڵییەکە راشیگەیاندووە، ئاردا گولەر لە ریال مەدرید دەمێنێتەوە، کە هاوینی 2023 ناوەڕاستکارە 19 ساڵانەکە لە فێنارباهچێی تورکییەوە بەرامبەر 20 ملیۆن یۆرۆ روویکردە ریزەکانی لۆس بلانکۆس.

رۆژنامەی ئاس ئاشکرایکردووە، لە تورکیا بڕوایان وایە ئاردا گولەر بەهۆی ئەو ئاستە بەرزەی لە یاریی بەرامبەر لیگانێس پێشکەشی کرد، شوێنی خۆی لە پێکهاتەی سەرەکی کارلۆ ئەنچیلۆتی دەکاتەوە.

گولەر لەم وەرزە لە سەرجەم پاڵەوانێتییەکان تەنیا 382 خولەک بە درێسی ریال مەدرید یاریی کردووە و خاوەنی ئەسیستێکە، لە بۆرسەی یاریزانانیش نرخەکەی 45 ملیۆن یۆرۆیە.