یاریگا –
ماوەیەکی زۆرە پلان و بیرۆکە لای بەرپرسانی خولی ئیسپانی گەڵاڵە بووە کە لە دیارترین یارییە بەهێزەکانی لالیگا ببرێتە دەرەوە و ویلایەتە یەکگرتووەکانی ئەمریکاش بۆ ئەو مەبەستە دەستنیشانکرابوو.
خافیێر تیباس سەرۆکی خولەکە یەکێک لەو داکۆکیکارانەبوو کە یاریی بەهێزی یانەکانی ئیسپانیا ببرێتە ئەمریکا. هەر بۆیە چاوەڕواندەکرا یەکەم رووبەڕووبوونەوەی ئەم وەرزەی لالیگا لەنێوان بارسێلۆنا و ئاتڵێتیکۆ مەدرید لە یاریگای هارد رۆکی شاری مەیامی ویلایەتی فلۆریدا بەڕێوەبچێت، بەڵام وا دیارە ئەوە روونادات.
بەگوێرەی زانیارییەکانی موندۆ دیپۆرتیڤۆی ئیسپانی، ئەو یاریەی نێوان بارسا و ئاتڵێتیکۆ کە بڕیاربوو 22ی مانگی دیسەمبەر لە مەیامی ئەنجامبدرێت، هەڵپەسێردراوە و یارییەکە لەوێ ناکرێت.
سەرچاوە جیاوازەکان هۆکارەکەیان بۆ کەمیی کات گەڕاندووەتەوە بە پرۆسەی گواستنەوەی یارییەک لە کەتەلۆنیاوە بۆ ئەمریکای باکوور.
لالیگا تاکە لایەن نەبوو بۆ بڕیاردان لەسەر ئەنجامدانی یارییەکی خولەکە لە ئەمریکا، دەبوو پێشوەختە رەزامەندی فیفا، یوێفا، فیدراسیۆنی تۆپی پێی شاهانەی ئیسپانیا، یەکێتی تۆپی پێی ئەمریکا و کۆنکاکاف وەربگریردرێت.
ئەوە یەکەمین هەوڵی شکستخواردوو نییە بۆ ئەنجامدانی یاریی یانەکانی ئیسپانیا لە ئەمریکا، ساڵی 2019یش هەوڵێکی لەو جۆرە هەبوو بۆ یاریی نێوان بارسێلۆنا و جیرۆنا هەروەها ئاتڵێتیکۆ مەدرید و ڤیاڕیاڵ دووچاری هەمان چارەنووس بوونەوە.
