یاریگا –
دەستەی کارگێڕی یانەی مانچێستەر لە کۆبوونەوەیەکی نائاساییدا، بڕیاری دوورخستنەوەی ئێریک تێن هاخیدا.
هەرچەندە مانچێستەر یونایتد لە بەیاننامەیەکدا باس لە جیابوونەوە نەک دوورخستنەوە دەکات، بەڵام بە گوێرەی زانیارییەکانی فابریزیۆ رۆمانۆ، تێن هاخ دوورخراوەتەوە و روود ڤان نیستێلڕۆی بە شێوەیەکی کاتی دەبێتە راهێنەر.
ئێریک تێن هاخ پۆستی راهێنەرایەتی تیمی یەکەمی مانچێستەر یونایتدی جێهێشت. سوپاسی تێن هاخ دەکەین، بۆ هەموو شتێک کە پێشکەشی یانەکەی کردووە، هیوای باشترین لە داهاتوودا بۆ دەخوازین.
روود ڤان نیستێلڕۆی بەشێوەیەکی کاتی دەبێتە راهێنەر و هەمان ستافی ئێستای لەگەڵدا دەمێننەوە، تاوەکو راهێنەرێکی هەمیشەیی دەستنیشان دەکرێت.
Club statement: Erik ten Hag.#MUFC
— Manchester United (@ManUtd) October 28, 2024
فابریزیۆ رۆمانۆ، رۆژنامەنووسی دیاری گواستنەوەکان بڵاویکردووەتەوە، بەهۆی ئەنجامە خراپەکانییەوە، تێن هاخ لە پۆستەکەی دوورخرایەوە.
🚨🔴 CONFIRMED: Erik ten Hag has been sacked by Manchester United with immediate effect as exclusively revealed!
Ruud van Nistelrooy will replace ten Hah as interim manager, the decision has been made. pic.twitter.com/r3ed9btRX8
— Fabrizio Romano (@FabrizioRomano) October 28, 2024
بەگوێرەی زانیارییەکانی رۆمانۆ بێت، رود ڤان نیستێلڕۆی، یاریدەدەری تێن هاخ بە شێوەیەکی کاتی دەبێتە راهێنەری شەیتانە سوورەکان.
لەدوای دۆڕانی یاریی دوێنێ بەرامبەر وێستهام بە ئەنجامی 2-1، دەستەی کارگێڕی مان یونایتد بڕیاری کۆتایی لەسەر دوورخستنەوەیدا، بەڵام تاوەکو ئێستا بە فەرمی هیچ شتێک رانەگەیێندراوە.
مانچێستەر یونایتد سەرەڕای گواستنەوەی چەندین یاریزان لە هاوینی رابردوودا، کەچی ئاستێکی ناجێگیر لەم وەرزەی پرێمەرلیگ پێشکەش دەکات.
مان یونایتد لە کۆی 9 یاریی پرێمەرلیگدا، تەنیا سێ یاریی بردووەتەوە، دوو یاریی یەکسانبووە و چوار یارییشی دۆڕاندووە. بەکۆکردنەوەی 11 خاڵ لە پلەی 14مدا دێت.
لەسەر ئاستی یۆرۆپالیگیشدا، مانچێستەر یونایتد بە کۆکردنەوەی سێ خاڵ لە سێ یاریدا، لە پلەی 21مدا دێت، پێنج گۆڵی لێکراوە و پێنج گۆڵیشی کردووە.
لە هاوینی رابردوودا، دەنگۆی زۆر لەسەر دوورخستنەوەی تێن هاخ هەبوو، بەڵام لە کۆتاییدا گرێبەستەکەی نوێکرایەوە، هەرچەندە پلەی هەشتەمی پرێمەرلیگی بەکۆکردنەوەی 60 خاڵ بەدەستهێنابوو.
ئێریک تێن هاخ لە ئەپریل/نیسانی ساڵی 2022 ئەرکی مەشقی مانچێستەر یونایتدی گرتەئەستۆ. نازناوکەنای جامی کاراباو 2023 و جامی FA 2024 بەدەستهێنا.
لەسەر داوای تێن هاخ، مان یونایتد لە وەرزی رابردوو بەبڕی نزیکەی 205 ملیۆن پاوەند هەریەکە لە ماتیاس دی لیخت، لێنی یۆرۆ، جۆشوا زیرکزی، مانوێل ئوگارتێ و نوسەیڕ مەزراوی گواستەوە ئۆڵدترافۆرد.
لە گەڕی سێیەمی ئەم وەرزەی پرێمەرلیگ، لیڤەرپوول 0-3 لە ئۆڵدترافۆرد لە مان یونایتد بردەوە، بەڵام چەند کاتژمێرێک دوای دۆڕانەکە، عومەر بێرادا، بەڕێوەبەری جێبەجێکاری یانەکە، پاڵپشتی تەواوی یانەکەی بۆ تێن هاخ دووپاتکردەوە.
پێشتر تێن هاخ بۆ ماوەی چوار ساڵ و نیو راهێنەری ئەیاکس بووە. پێش ئەوەش راهێنەرایەتی گۆ ئەهێد ئیگڵس و یوترێختی هۆڵەندی کردووە، پاشان بۆ ماوەیەک راهێنەری تیمی دووەمی بایرن میونشن بووە.
چوارشەممە مانچێستەر یونایتد لە ئۆڵدترافۆرد لە جامی خولی ئینگلتەرا، میوانداری لێستەر سیتی دەکات.
