یاریزانێکی نەسڕ ئامانجی ئەم زستانەی ریاڵ مەدریدە
مەدرید پلانی گواستنەوەکانی پێشخستووە
یاریگا –
یانەی ریاڵ مەدرید پلانەکانی گواستنەوەیان پێشخستووە و دەیانەوێ هەر لەم زستانەی دێت یاریزان بگوازنەوە ریزەکانیان.
یانە مەدریدیەکە بەدوای هێنانی یاریزانێکی دڵی بەرگری چەپلەردا دەگەڕێت و بۆ ئەو مەبەستەش چەند بژاردەیەکی دەستنیشانکردووە بۆ گواستنەوەکانی هاوینە. بەڵام لە نزیک مەودادا دەیانەوێ هەرچی زووە یاریزان بۆ ئەو پێگەیە پەیدا بکەن و ئێستا ئێمریک لاپۆرتی نەسڕ لە ئەگەر بەهێزەکانە.
بەگوێرەی زانیارییەکانی مارکای ئیسپانی، ریاڵ دەیەوێ ئەم زستانە گرێبەست لەگەڵ بەرگریکارەکەی پێشووی مانچێستەر سیتی واژۆ بکات.
🚨 Real Madrid plan to sign Aymeric Laporte from Al-Nassr this winter! 🤯🤍
(Source: @marca) pic.twitter.com/QXeu9ieLL4
— Transfer News Live (@DeadlineDayLive) October 25, 2024
جاری یەکەم نییە دەنگۆی نیازی ریاڵ مەدرید بۆ گواستنەوەی یاریزانە ئیسپانییەکە بڵاودەبێتەوە.
گرنگیدان بە لاپۆرت لەم کاتەدا، رەنگە بەهۆی زۆری ئەزموونەکانیەوە بێت لە هەردوو خولی ئیسپانی و ئینگلیزی. ئەوە و هەروەها ناوبراو کە ئێستا تەمەنی 27 ساڵە، لە یارییەکانی یۆرۆ ئاستێکی بەرزی پێشکەشکرد و یەکێک بوو لە رەگەزە سەرەکیەکانی لویس دی لافیۆنتی لە بردنەوەی نازناوەکە بۆ ماتادۆرەکان.
ئێمریک سەرەتا لە ئاتلێتیک بیڵباو دەستیپێکرد و تا 2018 لە یانە باسکیەکە مایەوە. دواتر گواسترایەوە بۆ مانچێستەر سیتی و هاوینی 2023 بە بڕی 23.6 ملیۆن پاوەند گواسترایەوە بۆ نەسڕ.
ریاڵ بۆ هەمان پێگە، چاوی لە تواناکانی کریستیان رۆمیرۆی ئەرجەنتینی یانەی تۆتنهام و ویلیام سالیبای فەڕەنسی یانەی ئارسیناڵە لە گواستنەوەکانی هاوینەدا.
