وازناهێنن؛ سعوودییەکان شێتی رافینیا بوونە

یاریگا –

بە پاڵپشتی سندووقی وەبەرهێنانی گشتی سعوودی (PIF)، هیلال و نەسر دەیانەوێت بە ئۆفەرێکی سەرسوڕهێنەر یاریزانە بەڕازیلییەکە قایل بکەن.

رافینیا کە تاوەکوو 2028 گرێبەستی هەیە، لەم دواییانەدا پابەندبوونی خۆی بە بارسێلۆناوە دووپاتکردەوە دوای ئەوەی راپۆرتەکان بانگەشەی ئەوەیان دەکرد کە لە داهاتووی خۆی دڵنیا نییە. ئەستێرە بەڕازیلییەک جارێکی دیکە کەوتووەتە ژێر چاودێریی تۆپی پێی سعوودی. ئەوان ئامادەن مووچەی ساڵانەی پوختی ئێستای بکەن بە چوار هێندە و ئۆفەرەکە بۆ بارسا دەگاتە 80 ملیۆن یۆرۆ.

وەکوو چۆن رۆژنامەی مۆندۆ دێپۆرتیڤۆ، لە 30ـی نیسان ئاماژەی بەوە کرد بوو کە چەندین یانەی هەرە گەورەی خولی پیشەگەری سعوودی هێشتا بە وردی چاودێریی دۆخی یاریزانی باڵی بەڕازیلی بارسێلۆنایان دەکرد و بیریان لە جووڵەیەک دەکردەوە بۆ هێنانی لەم هاوینەدا.

ئێستا، بەگوێرەی ئەو زانیارییانەی کە دەستی ئەم رۆژنامەیە کەوتوون، دوو یانە وەکوو بەربژێری سەرەکی دەرکەوتوون، ئەگەر هەوڵی فەرمی بۆ هێنانی ئەم یاریزانە بەڕازیلییە دەست پێ بکات؛ هیلال و نەسر، دوو بەهێزترین تیمی خولی سعوودی.

سەرچاوەکانی مۆندۆ دێپۆرتیڤۆ ئاماژە بەوە دەکەن کە ئەوان ئامادەن بڕی 80 ملیۆن یۆرۆ بە یانەی بارسێلۆنا بدەن. وەکوو بڵێی ئەمە بەس نەبێت، ئۆفەرێکی دارایی سەرنجڕاکێشیش پێشکەشی یاریزانەکە دەکەن، چونکە ئەوان ئامادەن چوار هێندەی ئەو مووچە پوختەیەی لە بارسێلۆنا وەری دەگرێت، پێشکەشی بکەن.

لە پشت ئەم کردانەوە جارێکی دیکە هێزی دارایی سندووقی وەبەرهێنانی گشتی (PIF) هەیە، کە سندووقی سەروەریی سعوودیەیە و بەردەوامە لە پەلکێشکردنی یاریزانی ئاستباڵا بۆ یانە ستراتیژییەکانی وڵاتەکە. سندووقی سعوودی هاوکات بەشێکی گەورە لە پاکێجی دارایی یاریزانەکە دەگرێتە ئەستۆ.

تاوەکوو ئێستا، رافینیا هەمیشە رایگەیاندووە کە نیازی وایە لە بارسێلۆنا بمێنێتەوە و لەبەر ئەوەش، هیچ دانوستانێکی پێشکەوتوو نییە. بەڵام گرنگیپێدانەکە بوونی هەیە و لە سعوودیە یاریزانە بەڕازیلییەکە وەکوو یەکێک لە سەرنجڕاکێشترین ئامانجەکانی بازاڕ لەم هاوینەدا دەبینن.

هێرشبەرەکە ئێستا سەرنجی لەسەر یاریکردنە لە دووەمین مۆندیالی خۆیدا لەژێر سەرکردایەتی کارلۆ ئانچێلۆتی و هێنانەدی خەونی بردنەوەی شەشەمین نازناوی جیهانی بۆ بەڕازیل، دوای دوورخرانەوەیان لە قۆناخی چارەکی کۆتایی لە بەرامبەر کرواتیا لە مۆندیالی قەتەر 2022، کە تێیدا بەشداریی لە سەرجەم یارییەکاندا کرد، بەڵام نەیتوانی گۆڵ بکات.

دوای مۆندیال، کە بڕیارە یاریی کۆتایی لە 19ـی تەممووزدا بەڕێوەبچێت، دەکرێت جووڵەی چڕتر لە لایەن سعوودیەوە لە دەوری ئەستێرەکەی بارسێلۆنا هەبێت، کە وەکوو یاریزانێکی سەرەکی بۆ هانزی فلیک دەمێنێتەوە.

گرنگیدان بە رافینیا شتێکی نوێ نییە. هاوینی رابردوو هەوڵ هەبوو بۆ قایلکردنی هەم بارسێلۆنا و هەم یاریزانەکە، لە کاتێکدا نزیکبوونەوەکان لە ساڵی 2024 تەنانەت بەهێزتر بوون، ئەگەرچی یاریزانە بەڕازیلییەکە لە کۆتاییدا بڕیاریدا لە سپۆتیفای کامپ نۆو بمێنێتەوە.

رافینیا خۆی لە زیاتر لە بۆنەیەکدا گوتوویەتی کە گفتوگۆیەک لەگەڵ فلیک لە ماوەی ئەو هاوینەی کە راهێنەرە ئەڵمانییەکە شوێنی چاڤی گرتەوە وەکوو راهێنەری بارسێلۆنا، بڕیاردەر بوو لە رەتکردنەوەی ئۆفەرێکی گەورە. ئەو لە تشرینی یەکەمی 2025 بە ئێس پی ئێن بەڕازیلی گوت:

ئەو ئۆفەرەی کە لە سعوودیەوە پێمان گەیشت زۆر سەرنجی راکێشام. ئەمە نەوەکوو تەنیا ژیانی تایبەتی من، بەڵکوو ژیانی دایک و باوکم، کوڕەکەم و زۆر کەسی دیکەشی چارەسەر دەکرد. من لە تەمەنی 15 ساڵییەوە یاریی تۆپی پێ دەکەم، لە هەموو شوێنێک بە کاتە باش و خراپەکاندا تێپەڕیوم، بۆیە کاتێک هات کە پێم وابوو دەبوو ئاگام لە خۆم و خێزانەکەم بێت. بە ئاشکرا، ئێمە بیرمان لە جێهێشتنی بارسێلۆنا کردەوە. پێم وابوو رەنگە کاتی گونجاو بێت بۆ رۆیشتن، بەڵام دواتر لەگەڵ فلیک قسەمان کرد و ئەو توانی قایلم بکات کە بمێنمەوە.

لەم دواییانەدا، یاریزانە بەڕازیلییەکە ئەو راپۆرتانەی رەتکردەوە کە بانگەشەیان دەکرد لە داهاتووی خۆی لە بارسێلۆنا دڵنیا نییە. لە راستییدا، یانەکە ئەو بە تەواوی قایل و پابەند بە پڕۆژەکە دەبینێت. بێگومان رافینیا، فلیکی بێهیوا نەکرد. ئاستی لە ماوەی وەرزەکانی دواییدا، بە جێگیرکردنی خۆی وەکوو یەکێک لە یەکلاییکەرەوەترین یاریزانەکانی بارسێلۆنا، ناوبانگی نێودەوڵەتی ئەویان زیاتر بەهێز کردووە.

یاریزانە بەڕازیلییەکە 34 گۆڵی لە وەرزی 2024-2025 کرد، کە تەنیا لە دوای 42 گۆڵەکەی رۆبێرت لیڤاندۆڤسکییەوە بوو، لە کاتێکدا سیانەیەکی هێرشبەریی کوشندەی لەپاڵ لامین یامال پێکهێنابوو. رافینیا هاوکات باشترین دروستکەری گۆڵی تیمەکە بوو بە پێشکەشکردنی 23 ئەسیست.

چەند پێکانێک کاریگەرییان لەسەر بەرهەمداریی ئەو لەم وەرزەدا هەبوو، بەمەش رێژەی گۆڵەکانی کەمکردەوە بۆ 21 گۆڵ و حەوت ئەسیست لە 33 یاریدا، کە 24 بەشداریکردن کەمتر بوو لە وەرزی پێشوو.

لە بارسێلۆنا، بە ئامانجی بەهێزکردنی هێڵی هێرشبەر بۆ ململانێی جدی لەسەر چامپیۆنزلیگ، ئانتۆنی گۆردن تازە بە بەهای 70 ملیۆن یۆرۆ گەیشتووە. یاریزانە ئینگلیزییەکە بە شێوەیەکی ئاسایی لە هەمان پێگەی رافینیا لە سپۆتیفای کامپ نۆو یاری دەکات، ئەگەرچی ئەو جێگرەوەیەک وەکوو هێرشبەری نووک پێشکەشی فلیک دەکات.

لە سعوودیە پێیان وایە رافینیا خاوەنی سەرجەم ئەو سیفاتانەیە کە ئەوان بەدوایدا دەگەڕێن بۆ بەردەوامبوون لە یارمەتیدانی گەشەکردنی خولەکە. لەبەر ئەو هۆکارە، هیلال و نەسر بەردەوامن لە چاودێریکردنی نزیکی یەکێک لە گەورەترین ناوەکانی پێکهاتەی بارسێلۆنا، کە لە 14ـی کانوونی یەکەمدا تەمەنی دەبێتە 30 ساڵ.

خۆرخێ خیسوس، راهێنەری نەسر، لە مێژەوە سەرسامێکی گەورەی رافینیایە. پاڵەوانی تازە تاج لەسەرنراوی خولی سعوودی خۆی خاوەنی کرستیانۆ رۆناڵدۆ، سادیۆ مانێ، کینگسلی کۆمان و دوو یاریزانی پێشووی بارسێلۆنایە، ئەوانیش جواو فێلیکس و ئینیگۆ مارتینێز، کە ژووری خۆگۆڕینیان لەگەڵ یاریزانە بەڕازیلییەکە لە بارسا بەش کردووە.

لە هیلال، کە لە لایەن سیمۆنی ئینزاگییەوە راهێنەرایەتی دەکرێت، ناوە سەرەکییەکان بریتین لە کەریم بێنزێما، یاریزانی پێشووی بارسێلۆنا و هاونیشتمانی بەڕازیلی، مالکۆم، یاسین بۆنۆ، خالیدۆ کۆلیبالی و تیۆ هێرناندێز.