یاریگا –
لێکۆڵینەوەکان لەدژی ئێمباپێ لەبارەی دەستدرێژیکردنە سەر خانمێکی سویدی بەردەوامن و ریال مەدرید کۆبوونەیەکی بەپەلەی لەبارەی ئەو ‘قەیران’ـە کردووە.
رۆژنامەی لۆپاریزیانی فەڕەنسی ئاشکرایکردووە، کیلیان ئێمباپێ لەلایەن پۆلیسی سوید بەوە تۆمەتبارە، لەکاتی مانەوەی لە یەکێک لە هۆتێلەکانی ستۆکهۆڵم دەسترێژی کردووەتە سەر خانمێک و ئێستا لە هەموو کەسێک زیاتر هێرشبەرە فەڕەنسییەکەی ریال مەدرید تۆمەتبارە، تا دێت زیاتر تۆمەتەکان ئاڕاستەی کیلیان دەکرێن.
رۆژنامە فەڕەنسییەکە رایگەیاندووە، پۆلیسی سوید هێرشبەرەکەی ریال مەدریدی بە تۆمەتباری راستەقینە داناوە و دەستی بە لێکۆڵینەوەکانی کردووە و سەردانی هۆتێلەکەی کردووە و ڤیدیۆ و کەرستە پێویستەکانی بۆ لێکۆڵینەوە لە رووداوەکە دەستپێکردووە.
لەلایەکی دیکەوە ئاژانسی هەواڵی فڕەنسی ئاشکرایکردووە، کەسانی دەوروبەری ئێمباپێ بە هەموو شێوەیەک تۆمەتەکان لەدژی کیلیان رەتدەکەنەوە و هەڕەشەی ئەوە دەکەن هەر کەسێک ئەم هەواڵە بڵاو بکاتەوە، داوای یاسایی لەسەر تۆمار دەکەن و بڕوایان وایە دروستکردنی ئەم ‘کەیسە؛ بۆ لێدانە لە هێرشبەرەکەی ریال مەدرید.
رۆمان مۆلینا، رۆژنامەنووسی فەڕەنسی دوای زیاتر وروژاندن و بڵاوبوونەوەی هەواڵەکە رایگەیاندووە، بەرپرسانی ریال مەدرید شەوی رابردوو کۆبوونەوەیەکی بەپەلەیان کردووە و لەبارەی ‘قەیرانەکە’ کۆبوونەتەوە و گفتوگۆیان لەبارەی تۆمەتباربوونی ئێمباپێ بە دەستدرێژی سێکسی کردووە.
بەگوێرەی سەرچاوەی میدیاکانی سوید، شەوی پێنجشەممە رووداوەکە لە یەکێک لە هۆتێلەکانی ستۆهۆڵم روویداوە و رۆژی هەینی خانمەکە چووەتە نەخۆشخانە و پۆلیس گوێی لێگرتووە، دواتر رۆژی شەممە ئەو خانمە ناوی ئێمباپێی هێناوە و ئەوی تۆمەتبار کردووە.
ئێمباپێ لە کاتژمێرەکانی سەرەتای بڵاوبوونەوەی هەواڵی تۆمەتباربوونەکەی هەرزوو بەیاننامەیەکی بڵاوکردەوە و هەواڵەکەی کەناڵی RMC SPORTـی فەڕەنسی بەدرۆ خستەوە.
رادیۆی مۆنتی کارلۆی فەڕەنسی ئاشکرایکردووە، ئێمباپێ بڕوای وایە پاریس سانجێرمان دەستی لە دروستکردنی ئەم تۆمەتە هەیە و دەیەوێت ناوبانگی ئەو یاریزانە بشێوێنێت، بەڵام رۆژنامەی لیکیپی فەڕەنسی ئاشکرایکردووە، بەرپرسانی یانەکەی پاریس رەتیدەکەنەوە هیچ پەیوەندییەکیان بە تۆمەتباربوونەکەی ئێمباپێ هەبێت.
