یاریگا –
ئێنزۆ فێرناندێز، یاریزانی هێڵی ناوەڕاستی ئەرجەنتین بەیاننامەیەکی لە ئینستاگرام بڵاوکردەوە و داوای لێبوردن لە فەڕەنسییەکان دەکات.
لە دوای بردنەوەی نازناوی کۆپا ئەمێریکا، ئێنزۆ ڵایڤێکی لە پلاتفۆڕمی ئینستاگرام کردەوە و لەگەڵ هاوتیمەکانی گۆرانیان دەگووتەوە کە چەندین دروشمی رەگەزپەرستی و جیاکاری تێدابوو.
ئامانج لە دروشمەکانی یاریزانانی ئەرجەنتین، یاریزانانی هەڵبژاردەی فەڕەنسا بوو، هەرزوو یەکێتیی تۆپی پێی فەڕەنسا بەیاننامەیەکی بڵاوکردەوە و سەرکۆنەی کرد. فیلیپ دیالۆ، سەرۆکی یەکێتییەکە داوای لە فیفا و یەکێتیی تۆپی پێی ئەرجەنتین کرد، رێکاری پێویست دژی دروشمە رەگەزپەرستییەکان بگرنەبەر.
ڤیدیۆی ئێنزۆ زوو لە سۆشیاڵ میدیا بووە ترێند و لەلایەن هەوادارانی تۆپی پێ سەرکۆنە کرا. بەگوێرەی چەند راپۆرتێکی رۆژنامەوانی بێت، چێڵسی لێکۆڵینەوەی لە رووداوەکە دەستپێکردووە.
درەنگانێکی شەوی رابردوو، ئێنزۆ فێرناندێز، بەیاننامەیەکی بە زمانی ئینگلیزی لە ئینستاگرام بڵاوکردەوە و داوای لێبووردنی کرد و دووپاتیکردەوە، دژی هەموو جۆرە رەگەزپەرستیێکە.
دەمەوێت لەدڵەوە داوای لێبووردن لەبارەی ئەو ڤیدیۆیەی بڵاوکراوەتەوە بکەم. گۆرانییەکە بە زمانێکی توند نووسراوەتەوە و هیچ بیانووێک بۆ ئەم وشانە نین. بە هەموو جۆرێک دژی رەگەزپەرستی دەوەستم و داوای لێبووردن دەکەم، چونکە کەوتبوومە نێو قووڵایی ئاهەنگەکانی بردنەوەی کۆپا ئەمێریکا. ڤیدیۆ و وشەکان، بەهیچ شێوەیەک ئاوێنەی بیرکردنەوە و کەسایەتی من نین. زۆر داوای لێبووردن دەکەم.
بەیاننامەکەی ئێنزۆ دوای کاردانەوەیەکی توندی وێسلی فۆفانا، هاوتیمی لە چێڵسی و یاریزانی هەڵبژاردەی فەڕەنسا بڵاوکرایەوە، کاتێک فۆفانا پۆستەکەی ئێنزۆی ریپۆست کرد و لەسەری نووسی؛ تۆپی پێ لە 2024: رەگەزپەرستی لەڕوو.
Le football en 2024 : racisme décomplexé 🤦🏽♂️🤦🏽♂️🤦🏽♂️ pic.twitter.com/MGkH5wPmNU
— Wesley Fofana (@Wesley_Fofana3) July 16, 2024
فێرناندێز تاوەکو ئێستا 28 یاری بۆ هەڵبژاردەی ئەرجەنتین کردووە و خاوەنی چوار گۆڵە. لە کۆپا ئەمێریکای رابردوو دوو ئەسیستی لە پێنج یاریدا کرد.
