ڤیدیۆ | لامین یامال چۆن لە ئەڵمانیا وانەکانی دەخوێنێت و بەشداریی یۆرۆی 2024 دەکات؟
دەڵێت: بیرکاری و مێژوو قورسترین وانەن
یاریگا –
فیدراسیۆنی تۆپی پێی ئیسپانیا ڤیدیۆیەکی بڵاوکردووەتەوە، تیایدا چۆنییەتی خوێندن و مەشق و راهێنانەکانی لامین یامالی پیشان داوە، لە ڤیدیۆیەکەدا هێرشبەرە لاوە ئیسپانییەکە باسی دروستکردنی هاوسەنگی لە نێوان خوێندنەکەی و یۆرۆی 2024 دەکات.
لامین یامال هێرشبەری 16 ساڵانی هەڵبژاردەی ئیسپانیا پۆڵی چوارەمی ئامادەییە و پێش دەستپێکی جامی نەتەوەکانی ئەوروپا رایگەیاندبوو، دەفتەر و کتێبەکانی لەگەڵ خۆی بردووەتە ئەڵمانیا بۆ ئەوەی بە شێوەی ئۆنلاین وانەکانی بخوێنێت و خۆی بۆ تاقیکردنەوەکانی کۆتایی ساڵ ئامادە بکات، کە دوای تەواوبوونی یارییەکانی یۆرۆی 2024 دەکرێن.
لامین یامال لەبارەی خوێندنەکەی دەڵێت ‘بیرکاری و مێژوو قورسترین وانەی قوتابخانەن’، دەشڵێت ‘گۆڵکردن لە ریاڵ مەدرید لە تاقیکردنەوەی بیرکاری قورسترە’.
هێرشبەرە لاوەکەی بارسێلۆنا دەڵێت :’سەرەڕای ئەوەی پابەندم بە مەشق و راهێنانەکانی هەڵبژاردەکەم و بەشداریی یۆرۆی 2024 دەکەم، بەڵام سوورم لەسەر ئەوەی خوێندنەکەم فەرامۆش نەکەم و کاتی تایبەتم بۆ خوێندنەکەم داناوە و لێرە بە تەنیا وانەکانم دەخوێنم’.
