مان یونایتد شوێنگرەوەی مارسیالی دەستنیشانکردووە

یاریگا –

مانچێستەر یونایتد ئامادەکاری بۆ پێشکەشکردنی 60 ملیۆن پاوەند بە ماتیوس کونها دەکات.

مان یونایتد پڕۆسەی گەڕان بە دوای شوێنگرەوەی ئانتۆنی مارسیال، دەستپێکردووە. رۆژنامەی میرەر بڵاویکردووەتەوە، کونها، یاریزانی وۆڵڤز ئێستا ئامانجی سەرەکی مان یونایتدە، تاوەکو شوێنی مارسیال بگرێتەوە.

گرێبەستی مارسیال لە ئۆڵدترافۆرد بەسەرچووە و نوێ ناکرێتەوە، مان یونایتد ئێستا تەنیا راسموس هۆیلوند و مارکۆس راشفۆردی لە هێڵی پێشەوە ماوە، بۆیە گواستنەوەی هێرشبەرێک پێویستییە.

لە راپۆرتی رۆژنامەکەدا هاتووە، محەمەد قدووس، یاریزانی وێستهام یەکێکی دیکەیە لە داواکراونی شەیتانە سوورەکان.

لە وەرزی رابردوودا، کونها 14 گۆڵ و هەشت ئەسیستی بۆ وۆڵڤز کرد و یەکێک بوو لە باشترین یاریزانانی میدلاندس.

پێشبینی بازاڕێکی گەرم لە ئۆڵدترافۆرد دەکرێت. سێر جیم راتکڵیف، خاوەنی پشکی کەمینەی یانەکە دەیەوێت گۆڕانکاری گەورە لە یانەکەدا بکات، جیا لەمەش خەریکی خوێندنەوەن بۆ ئەگەرەکانی دوورخستنەوەی ئێریک تێن هاخ و دەستنیشانکردنی راهێنەرێکی نوێ.