مۆدریچ بڕیاری کۆتایی لەسەر مانەوە لە ریال مەدرید دەدات
پێشبینی مانەوەی لوکا لە بێرنابیۆ ناکرێت
یاریگا –
پێدەچێت کاروانی وەرزشی لوکا مۆدریچ لە ریال مەدرید گەیشتبێتە خاڵی کۆتایی.
لەم ماوەیەدا زۆر باس لە ئەگەرەکانی پێش بەردەوامبوونی مۆدریچ و تۆنی کروس لەگەڵ یانەکەی مەدرید دەکرێت، ئەمە لە کاتێکدایە مەدرید ئامادەکاری بۆ پێشوازیکردن لە کیلیان ئێمباپێ، کاپتنی هەڵبژاردەی فەرەنسا دەکات.
ڤالدیکا لێمیچ، بەڕێوەبەری کارەکانی مۆدریچ لەبارەی داهاتووی خاوەنی خەڵاتی باڵۆن دۆر دەڵێت
تاوەکو ئێستا هیچ شتێک لەبارەی داهاتووی مۆدریچ لە ریال مەدرید روون نەبووەتەوە، هەفتەی داهاتوو شتەکان زیاتر روون دەبنەوە. ریال مەدرید ماڵی مۆدریچ و بەیەکەوە بڕیار لەسەر باشترین دەدەین.
پێشبینی دەکرێت لە دوای تەواوبوونی یاری کۆتایی چامپیۆنزلیگ، یاریزانی نێودەوڵەتی کڕواتی بڕیاری کۆتایی لەسەر داهاتووی لە بێرنابیۆ دەدات.
لەم وەرزەدا مۆدریچ تەنیا لە 16 یاریدا وەک یاریزانی سەرەکی یاری کردووە، ئەمەش بەهۆی زیادبوونی یاریزانی لاو لە پێکهاتەی کارلۆ ئانچێلۆتی و گەورەبوونی تەمەنی لوکا.
مۆدریچ دەیەوێت بەر لە دەستپێکردنی یۆرۆی 2024 داهاتووی یەکلاییبکاتەوە، تاوەکو سەرنجی تەواو لەسەر پاڵەوانیەتییە گەورەکە دابنێت.
