هەڵسەنگاندنی یاریگا | هێمن نازم ئەستێرەی گەڕی چوارەمی خولی نایابی کوردستان بوو

یاریگا –

دوای تەواوبوونی یارییەکانی هەر گەڕێک لە خولی نایابی کوردستان، تۆڕی وەرزشی یاریگا بە پشتبەستن بە ئامارەکان و هەڵسەنگاندنی شارەزایان ئەستێڕەی هەفتەی خولەکە دەستنیشان دەکات.

هێمن نازم ئەستێرەی گەڕی چوارەم بوو

لە یاریی بەرامبەر ئارارات کە بەهۆی خراپی کەشوهەواوە یارییەکە لە پیرمامەوە گواسترایەوە هەولێر و لە یاریگای دووەمی فڕەنسۆ هەریری بەڕێوەچوو، هێمن نازم ناوەڕاستکاری یانەی هەندرێن دوو گۆڵی تۆمارکرد و هەندرێن بەو دوو گۆڵە سێ خاڵی گرنگی بەدەستهێنا و هاتە پێشەنگی خولەکە.

هێمن نازم (30 ساڵ) کە پێشتر لە ریزی یانەکانی برایەتی و پێشمەرگەی هەولێر و زێرەڤانی یاریی کردووە، لەم وەرزە لە چوار یاری دوو گۆڵی کردووە و ئەستێرەی یاریی ئارارات و هەندرێن بوو.

کێی دیکە کاریگەر بوو؟

جگە لە هێمن نازم، لە گەڕی چوارەمی خولەکە مەحموود شاکر یاریزانی چوارقوڕنەش کاریگەر بوو، دوو گۆڵی تۆمارکرد و لە گەرمیان یەکەم بردنەوەی لەم وەرزە بۆ چوارقوڕنە بەدەستهێنا، مەحموود شاکر لە دوایین ساتەکانی یارییەکە بە لێدانی سزا گۆڵی بردنەوەی بۆ چوارقوڕنە کرد و 2-1 لە شێروانەیان بردەوە و پێشەنگی خولەکەیان پێ چۆڵکرد.

یادگار ئیبراهیم یاریزانی سەیدسادق یەکێکی دیکە بوو لە یاریزانە کاریگەرەکانی گەڕی چوارەم، دوو گۆڵی بەرامبەر برایەتی کرد و ئەویش لەم هەفتەیە دووانەی تۆمارکرد، بەڵام یانەکەی 2-3 بە برایەتی میوانداریی دۆڕا.

شڤان جەمیل یاریزانی ئاکرێش رۆڵێکی کاریگەری هەبوو لەم هەفتەیە، لە کاتی زیادکراودا گۆڵی بردنەوەی بۆ ئاکرێ تۆمارکرد و بەو گۆڵە لە هەولێری میوانیان بردەوە.

لە گەڕی چوارەم چی روویدا؟

لە گەڕی چوارەمی خولی نایابی کوردستان، لەکۆی 8 یاریی گەڕەکە 18 گۆڵ تۆمارکران واتە بە رێژەی 2.25 گۆڵ لە هەر یارییەک تۆمارکران، 43 کارتی زەرد و کارتێکی سوور بەرزکرانەوە و دوو پێناڵتیش هەژمارکران، یەکێکیان فەوتێنرا و یەکێکیان کرایە گۆڵ.

https://www.facebook.com/Yariga/posts/pfbid0cL9VyxUMTMMMA82RX1mBQTc2VwX1DBcqG6vXv7j4ndeWDrx12Puco5XyjgN5Em7dl