یاریگا –
بارسێلۆنا رووبەڕووی مەترسییەکی جددی بووەتەوە، دیارترین بژاردەش، دابەزینیەتی بۆ خولی پلە دووەکان، ئەگەر تۆمەتەکانی بەسەردا ساخ ببنەوە.
لێکۆڵینەوەیەکی فەرمی لەگەڵ یانە کاتالۆنییەکە دەستیپێکردووە، بە بیانووی پێدانی بەرتیل بە لیژنەی ناوبژیوانان و کەیسی پەیوەندیدار بە نێگرێیرا.
دادگایەکی بارسێلۆنا روونیکردەوە، پۆلیسی ئیسپانیا نووسینگەکانی یەکێتیی تۆپی پێی ئیسپانیای لە مەدرید پشکنی، ئەمەش لە درێژەی کەیسی لێکۆڵینەوە لە پێدانی بەرتیل بە لیژنەی ناوبژیوانان.
بەرنامەی بەناوبانگی چرینگیتۆ تەواوی ئەو سزایانەی خستەڕوو کە رەنگە بەسەر بارسێلۆنا بسەپێندرێن، ئەگەر تۆمەتەکانی لەسەر ساخبێتەوە.
سزای یەکەم: دابەزینی بارسێلۆنا بۆ خولی پلە دووەکان و بەشداری نەکردنی لە لالیگای وەرزی داهاتوو.
سزای دووەم: رەنگە کێشەکەی بارسێلۆنا چارەسەر ببێت، بەڵام مەترسی دوورخستنەوەی لە چامپیۆنزلیگ لەسەرە، بەبێ ئەوەی وادەی سزاکەی دیاربێت.
سزای سێیەم: زیندانی کردنی تێوەگلاوان لە کەیسی پێدانی بەرتیل بە ناوبژیوانان.
🚨 El EDITORIAL de @jpedrerol en #JUGONES:
🤔”No vale decir que no pasa nada. El juez acusa al Barça de un delito de cohecho y es muy grave”.
😤 “Esperaremos a la sentencia, pero el culé tiene motivos para estar preocupado… y enfadado con sus dirigentes”. pic.twitter.com/Xsi4vf7HUA
— El Chiringuito TV (@elchiringuitotv) September 28, 2023
خواکین ئاگێری لۆپێز، دادوەری بەرپرسیار لە لێکۆڵینەوە لە کەیسەکە، لە سەرەتای ئەم مانگە روونیکردبووەوە، رەنگە بارسێلۆنا سوودی لە گەندەڵییە یەکلایی نەبووەکە، وەرگرتبێت.
لە ئاداری رابردوودا، چەندین سکاڵا بەرزکرانەوە کە باسیان لە پێدانی زیاتر لە 7.3 ملیۆن یۆرۆ بە درێژایی 17 ساڵ بەو کۆمپانیایانە دەکرد کە خۆسێ ماریا ئێنریکێز نێگرێیرا، جێگری سەرۆکی لیژنەی ناوبژیوانان لە یەکێتیی تۆپی پێی ئیسپانی لە ساڵانی 1993 تاوەکو 2018 خاوەنی کۆمپانیاکە بوو.
بارسێلۆنا لە بەیاننامەیەکدا رەتیکردەوە هیچ جووڵەیەکی نایاسایی کردبێت و ئەو پارەی خەرجکراوە، لە چوارچێوەی چالاکییەکی ئاشکرایە لە نێو یانەکاندا.
تۆپی پێی و یەکێتیی تۆپی پێی ئیسپانیا بە ساتێکی هەستیاردا تێدەپەڕێت، ئەمەش دوای دوورخستنەوەی لویس روبیالیس لە پۆستەکەی، دوای رووداوی ماچەکەی یاری کۆتایی مۆندیالی خانمان.
