رۆبێرت سانچێز ئامانجی نوێی مانچێستەر یونایتدە

یاریگا –

رۆبێرت سانچێزی گۆڵپارێزی یانەی برایتن ئامنجە نوێیەکەی یانەی مانچستەر یونایتدە.

ئاندرێ ئۆنانا ئامانجی سەرەکی مانچستەر یونایتدە لەم گواستنەوەی هاوینەدا، دانوستانەکانیش لەگەڵ ئینتەرمیلان بۆ ئەم یاریزانە دەستیپێکردووە.

یەکەم ئۆفەری شەیتانە سوورەکان بۆ ئەم یاریزانە بڕی 40 ملیۆن یۆرۆ بوو، کە لەلایەن بەڕێوەبەرانی ئینتەرمیلانەوە رەتکرایەوە و دەیانەوێت بەلایەنی کەمەوە 50 ملیۆن یۆرۆ وەربگرن لەگەڵ بڕگەی 10 ملیۆن پاداش.

ئەمەش وایکردووە مانچێستەر یونایتد بیر لە بژاردەی دیکە بکاتەوە. پێشتر باس لەوە کرابوو کە بەنیازن ئۆفەرێک پێشکەش بە جەستن بیلۆی گۆڵپارێزی یانەی فاینۆرد بکەن، بەڵام ئێستا بی بی سی سپۆڕت بژاردەیەکی نوێی پێشنیار کردووە.

ئەم پێگە ئینگلیزییە بانگەشەی ئەوە دەکات کە یونایتد بەدوای بژاردەیەکی نوێ دا دەگەڕێت و سانچێز یەکێکە لەو گۆڵپارێزانەی کە سەرنجی ئەوانی راکێشاوە.

ئەو گۆڵپارێزە تەمەن 25 ساڵە لە برایتن ئاستێکی باشی پێشکەش کردووە. پێناچێت یانەکەش داوای زیاتر لە 35 ملیۆن یۆرۆی بۆ بکات، ئەمەش بڕە پارەیەکی گونجاوە بۆ یونایتد.

گرێبەستەکەی دی خیا لەگەڵ یونایتد کۆتایی هات و ئێستا یاریزانێکی ئازادە. هەرچەندە تاوەکوو ئێستا دانوستانەکانی نێوان هەردوولا بەردەوامن، بەڵام ئەگەری جێهێشتنی ئۆڵدترافۆرد زۆر زۆرە.