یاریگا
یانەی برایتۆنی ئینگلیزی گرێبەستی مۆیسیس كایسێدۆ یاریزانی یانەكەی بۆ ماوەیەكی درێژ نوێ كردەوە.
برایتۆن بە نوێكردنەوەی گرێبەستەكەی كایسێدۆ دەرگای بەڕووی هەردوو یانەی ئارسیناڵ و چێڵسیدا داخست كە هەردوو یانە ئۆفەریان بۆ گواستنەوەی یاریزانەكە پێشكەشكردبوو، بە جۆرێك بلووز بڕی 55 ملیۆن پاوەند و گەنەرزیش بڕی 70 ملیۆنیان پێشكەشكرد لەپێناو بەدەستهێنانی تواناكانی یاریزانە ئیكوادۆریەكە.
یانەی برایتۆن لە هەژماری فەرمی خۆیان نوێكردنەوەی گرێبەستی كایسێدۆیان تا ساڵی 2027 راگەیاند.
فانریزیۆ رۆمانۆ رۆژنامەنووسی ئیتاڵی و شارەزا لە گواستنەوەی یاریزانان لە هەژماری تایبەتی خۆی رایگەیاند كە موچەی كایسێدۆ زیادكردنێكی بەرچاو بەخۆیەوە دەبینێت لە موچەكەی پێشووتری.
لە دوای نوێكردنەوەی گرێبەستەكەی رۆبێرتۆ دی زێربی راهێنەری برایتۆن گوتی: ئەمە هەواڵێکی گەورەیە بۆ یانەکە، بۆ هاندەرەكانمان، لە هەمووی گرنگتر بۆ مۆیسیس، ئەوە بەهێزترمان دەکات لەگەڵ پێشکەوتنمان بەرەو ئامانجەکانمان لە یاریگادا.
