یاریگا –
چەند چەکدارێک پەیامێکی هەڕەشەئامێز بۆ لیۆنێل مێسی جێدەهێڵن.
دوو چەکدار کە مۆتۆرسکیڵیان پێبووە، هێرشیانکردە سەر سوپەرمارکێتێک کە خێزانی هاوژینەکەی مێسی خاوەنداریەتی دەکات.
سوپەرمارکێتەکە بە ناوی یونیکۆیە و دەکەوێتە ناوەندی شاری رۆزاریۆ، گەورەترین شاری پارێزگای سانتا فی.
سەر لە بەیانی ئەمڕۆ پێنجشەممە، دوو چەکدار هێرشیانکردە سەر سوپەرمارکێتەکە و وێرانکاری زۆریان بەدوای خۆیاندا هێشت، پۆلیسی رۆزاریۆ دووپاتیکردەوە، زیان بەر هیچ کەسێک نەکەوتووە.
پۆلیسی شارەکە روونیکردووەتەوە، دوو چەکدارەکە نامەیەکی هەڕەشە ئامێزیان بۆ مێسی جێهێشتبوو و تیایدا هاتووە: مێسی، ئێمە چاوەڕێت دەکەین، جاڤکین بازرگانی ماددە هۆشبەرەکانە، دواتر ئەو ئاگای لێت نابێت.
پابلۆ جاڤکین، بەڕێوەبەری شارەوانی رۆزاریۆیە و لێکۆڵینەوەکان لەبارەی رووداوەکە بەردەوامن.
جاڤکین بەر لە رووداوەکە بە رۆژنامەنووسانی راگەیاند بوو؛ لە ماوەی رابردوودا توندوتیژییەکان لە رۆزاریۆ زیادبوون، هێزەکانی پۆلیسیش کەمە، بۆیە ئاسایشی شارەکە پارێزراو نییە و داوای لە حکومەت کرد، هێزی زیاتریان بۆ رەوانە بکات.
لیۆ مێسی، کە چەند رۆژێک لەمەوبەر خەڵاتی زە بێستی بردەوە، خەڵکی رۆزاریۆیە و هەروەها ئانتۆنێلا روکۆزۆی هاوژینیشی خەڵکی هەمان شارە.
