یەکەم بردنەوە بۆ ئیراولا؛ لیڤەرپوول بە راهێنەری نوێوە بەڵێنی پێشکەشکردنی یاریی سەرنجڕاکێش دەدات

یاریگا –

راهێنەرە ئیسپانییەکە بە بردنەوە دەستی بە کاروانی خۆی لەگەڵ لیڤەرپوول کرد، بەهۆی گۆڵەکانی مۆریسن، سۆبۆسلای، کیێزا و کووماس. گۆمێز بەهۆی پێکانەوە یاریگای جێهێشت.

ئیراولا یەکەم یاریی خۆی وەکوو راهێنەری لیڤەرپوول کرد و دەتوانێت بە خەندەوە یادی بکاتەوە دوای بردنەوەی لە یانەی سەندەرلاند لە یاریی کردنەوەی پێشوەرز و گەشتی ویلایەتە یەکگرتووەکانی ئەمریکا. ئەزموون و کوالێتیی سۆبۆسلای و کیێزا جیاوازییەکەیان دروست کرد.

هەردوو تیمەکەی پرێمەرلیگ لە ناشڤیل رووبەڕووی یەکتر بوونەوە و نمایشێکی مەزنیان پێشکەش کرد، بە گۆڵی نایاب و بیرۆکەی تاکتیکیی باشەوە. لە لایەکەوە یاریی بەکۆمەڵ بوو کە ئیراولا دەیەوێت بیسپێنێت و لە لایەکەی دیکەشەوە پەستانی بەرزی سەندەرلاند و گواستنەوە خێراکان لەژێر سەرپەرشتیی لۆ بریس.

یارییەکە بە دەستپێکێکی خراپ بۆ ئیراولا دەستی پێ کرد کاتێک گۆمێز، کە کاپتنی تیمەکە بوو، ناچار بوو بەهۆی پێکانەوە یاریگا جێ بهێڵێت. بەڵام کەمێک دواتر، مۆریسن دەرگای گۆڵکردنی بە جووڵەیەکی بەکۆمەڵی درەوشاوە کردەوە کە لە قووڵایی نیوەی یاریگای خۆیانەوە دەستی پێ کردبوو.
پێش تێپەڕبوونی نیو کاتژمێر، لێ فی گۆڵی یەکسانبوونەوەی سەندەرلاندی بە لێدانێکی بەهێزی پێی چەپ بۆ گۆشەی سەرەوەی گۆڵ، کرد کە مامارداشڤیلی نەیتوانی هیچ بەرامبەری بکات. دوای دەستپێکردنەوەی گێمی دووەم، توتێرۆڤ ئەنجامەکەی هەڵگەڕاندەوە دوای ئەوەی بە هێمنی لە بارودۆخێکی رووبەڕووبوونەوەی راستەوخۆدا گۆڵی دووەمی سەندەرلاندی کرد.

لە گێمی دووەمدا کە کەمێک ناهاوسەنگتر بوو دوای گۆڕانکارییە زۆرەکان و هاتنەناوەوەی چەندین یاریزانی لاو، کەسایەتییە بەئەزموونەکان ئاڕاستەی یارییەکەیان گۆڕی. سەرەتا سۆبۆسلای هێزی گۆڵکردنی خۆی بە لێدانێکی نایاب لە لێواری ناوچەی سزاوە نیشاندا و کیێزا بە کۆتاییهێنانێکی سەرنجڕاکێش لەنێو ناوچەی سزا لیڤەرپوولی خستەوە پێشەنگ. کووماس ئەنجامەکەی یەکلا کردەوە دوای ئەوەی یارییەکە کرایەوە و باڵادەستیی روونی لیڤەرپوولی پشتڕاست کردەوە.

ئیراولا دەرفەتێکی دیکەی دەبێت تاوەکوو بەردەوام بێت لە سەرپێخستنی تیمەکەی پێش دەستپێکردنی وەرزی خولەکە لە رۆژی چوارشەممە، کاتێک لیڤەرپوول رووبەڕووی رێکسام دەبێتەوە.