کیلیان پێشکەوتەوە؛ ململانێی تۆمارکردنی زۆرترین گۆڵ لە مێژووی مۆندیال بەردەوامە

یاریگا –

تۆمارکردنی دوو گۆڵ بەرامبەر ئینگلتەرا رێگە بە هێرشبەرە فەڕەنسییەکە دەدات لە ریزبەندیی مێژووییدا پێش یاریزانە ئەرجەنتینییەکە بکەوێت. لیۆنێل مێسی و کیلیان ئێمباپێ بەردەوامن لە ململانێکەیاندا بۆ ئەوەی بزانرێت کێ ئەم مۆندیالە وەکوو گۆڵکاری هەرە گەورەی مێژووی جامی جیهانی کۆتایی پێ دەهێنێت. بەهۆی ئەو دوو گۆڵەی بەرامبەر ئینگلتەرا تۆماری کردن، کیلیان ئێمباپێ ئێستا خاوەنی 22 گۆڵە و پێش مێسی کەوتووە.

کیلیان ئێمباپێ 22 گۆڵی تەنیا لە سێ مۆندیالدا کردووە: چوار گۆڵ لە 2018، هەشت گۆڵ لە 2022 و 10 گۆڵ لە 2026. لەم پاڵەوانییەتییەدا، ئەو دوو گۆڵی بەرامبەر سێنیگال، دوو گۆڵ بەرامبەر عێراق، دوو گۆڵ بەرامبەر سوید، گۆڵێک بەرامبەر پاراگوای، گۆڵێک بەرامبەر مەغریب و دوو گۆڵی دیکەی بەرامبەر ئینگلتەرا کردووە.

لیۆنێل مێسی 21 گۆڵەکەی بەسەر ئەو شەش مۆندیالەدا دابەشکردووە کە تێیدا یاریکردووە، ئەگەرچی تەنیا لە پێنج مۆندیالیاندا گۆڵی کردووە: گۆڵێک لە 2006، چوار گۆڵ لە 2014، گۆڵێک لە 2018، حەوت گۆڵ لە 2022 و هەشت گۆڵ تاوەکوو ئێستا لە 2026. ئەو لە مۆندیالی 2010 هیچ گۆڵێکی نەکرد. گۆڵەکانی لەم خولەی پاڵەوانییەتییەکەدا پێکهاتوون لە هاتریکێک بەرامبەر جەزائیر، دوو گۆڵ بەرامبەر نەمسا لە دووەم یاریی کۆمەڵەکاندا، لێدانێکی راستەوخۆ بەرامبەر ئوردن، گۆڵێک بەرامبەر کەیپ ڤێرد و دانەیەکی دیکە بەرامبەر میسڕ.

میرۆسلاڤ کلۆزە 16 گۆڵی لەنێوان ئەو چوار مۆندیالەدا کرد کە تێیدا یاریکرد: پێنج گۆڵ لە 2002، پێنج گۆڵ لە 2006، چوار گۆڵ لە 2010 و دوو گۆڵ لە 2014. ئەفسانەی بەڕازیلی رۆناڵدۆ 15 گۆڵی لەو چوار مۆندیالەدا کرد کە هاوبەش بوو تێیدا، ئەگەرچی تەنیا لە سێ دانەیاندا یاریی کرد. ئەو لە 1994 بەشدار نەبوو، بەڵام چوار گۆڵی لە 1998، هەشت گۆڵ لە 2002 و سێ گۆڵی لە 2006 کرد.

بە 14 گۆڵ گێرد مولەری ئەڵمانی دێت، کە لە دوو مۆندیالدا کردنی، 10 گۆڵ لە 1974 کاتێک بووە پاڵەوانی جیهان و چوار گۆڵ لە 1978، هاوكات هاری کەینی ئینگلیزی، کە لە ماوەی ئەم پاڵەوانییەتییەدا پێش گاری لێنیکەر کەوت بۆ ئەوەی ببێتە گۆڵکاری مێژوویی ئینگلتەرا لە مۆندیالدا. کەین شەش گۆڵی لە 2018، دوو گۆڵی لە 2022 کردووە و تاوەکوو ئێستا شەش گۆڵی لە 2026 کردووە.

ژوست فۆنتێنی فەڕەنسی خاوەنی 13 گۆڵە، کە هەموویانی لە مۆندیالی 1958 لە سوید کرد، کە تەنیا مۆندیال بوو تێیدا یاریی کردبێت. پێلێ بە 12 گۆڵ لەنێوان چوار مۆندیالدا کۆتایی پێهێنا: شەش گۆڵ لە 1958 کاتێک یەکەم نازناوی بردەوە، گۆڵێک لە 1962، گۆڵێک لە 1966 و چوار گۆڵ لە 1970 کاتێک سێیەم جامی مۆندیالی بەرزکردەوە.

سێ یاریزان خاوەنی 11 گۆڵی مۆندیالن: یۆرگن کلینسمانی ئەڵمانی، شاندۆر کۆچیشی هەنگاری و کریستیانۆ رۆناڵدۆی پۆرتوگالی. کلینسمان سێ گۆڵی لە 1990، پێنج گۆڵی لە 1994 و سێ گۆڵی لە 1998 کرد. کۆچیش سەرجەم 11 گۆڵەکەی لە مۆندیالی 1954 لە سویسرا کرد، شوێنێک کە تێیدا هەنگاریا یاریی کۆتایی بە ئەڵمانیای رۆژاوا دۆڕاند. کریستیانۆ رۆناڵدۆ تاکە یاریزانە لە مێژوودا کە لە شەش مۆندیالی جیاوازدا گۆڵی کردبێت: گۆڵێک لە 2006، گۆڵێک لە 2010، گۆڵێک لە 2014، چوار گۆڵ لە 2018، گۆڵێک لە 2022 و سێ گۆڵ لە 2026.

ئەو یاریزانانەی خاوەنی 10 گۆڵی مۆندیالن پێکهاتوون لە گابریێل باتیستوتا (ئەرجەنتین)، تیۆفیلۆ کۆبیاس (پێرو)، گریگۆژ لاتۆ (پۆڵەندا)، گاری لێنیکەر (ئینگلتەرا)، تۆماس مولەر (ئەڵمانیا) و هێلموت ران (ئەڵمانیا).

چەندین یاریزانی ئەفسانەیی بە 9 گۆڵی مۆندیالەوە وازهێنانیان راگەیاند، لەوانە ئادێمیر (بەڕازیل)، کە هەموو گۆڵەکانی لە مۆندیالی 1950 کرد؛ ئیوزێبیۆ (پۆرتوگال)، کە لە ئینگلتەرای 1966 ئەو دەستکەوتەی بەدەستهێنا؛ رۆبێرتۆ باجیۆ (ئیتالیا)؛ پاولۆ رۆسی (ئیتالیا)؛ کارڵ هاینز رۆمەنیگە (ئەڵمانیا)؛ ئوڤە زێلەر (ئەڵمانیا)؛ ڤاڤا (بەڕازیل)؛ کریستیان ڤێری (ئیتالیا)؛ دەیڤد ڤیا (ئیسپانیا) و جایرزینیۆ، کە بە گۆڵکردن لە سەرجەم ئەو یارییانەی کە بەڕازیل لە مۆندیالی 1970 ئەنجامی دان مێژووی دروستکرد، بە شێوازێک کە حەوت گۆڵی لە مەکسیک و دوو گۆڵی دیکەی لە ئەڵمانیای رۆژاوا لە 1974 کرد.