قبووڵی دەکەم؛ سکالۆنی دان بەوەدا دەنێت کە ئارەزوو دەکات لە یاریی کۆتایی رووبەڕووی ئیسپانیا ببێتەوە

یاریگا –

لیۆنێل سکالۆنی دانی بەوەدا نا کە حەز دەکات لە کۆتایی مۆندیالی 2026 رووبەڕووی ئیسپانیا ببێتەوە، هاوکات پشتڕاستیشی کردەوە کە لیاندرۆ پارێدێس ئامادە و بەردەستە پێش رووبەڕووبوونەوەکەی ئەرجەنتین لە قۆناخی 16 بەرامبەر میسر. راهێنەرەکەی ئەرجەنتین پێش یاریی قۆناخی کرانەدەرەوەی تیمەکەی قسەی دەکرد، بەڵام هاوکات چاوی لە ئەگەری رووبەڕووبوونەوەی تیمی لویز دێلا فۆێنتێ بوو لە یاریی لووتکەی پاڵەوانییەتییەکەدا و گوتی:

ئەگەر لە یاریی کۆتاییدا ئیسپانیا بێت، من قبووڵی دەکەم. هەوڵ دەدەین ئەوە بێتەدی، هیوادارین رووبدات.

ئەگەریی یاریی کۆتایی نێوان ئەرجەنتین و ئیسپانیا هاوكات ئەو رووبەڕووبوونەوەیە زیندوو دەکاتەوە کە زۆر کەس چاوەڕوانی بینینی بوون لە یاریی ‘فیناڵیسما’ کە ماوەیەکی درێژ باسی لێوە دەکرا، بەڵام هەرگیز ئەنجام نەدرا.

هیچ کام لە بەربژێرە سەرەکییەکان باڵادەست نەبوون

سکالۆنی پێی وایە ئەم مۆندیالە زۆر لەوە قورستر بووە کە چاوەڕوان دەکرا، بە شێوەیەک کە تەنانەت گەورەترین بەربژێرەکانیش زەحمەتی دەکێشن بۆ پێشکەشکردنی ئاستی جێگیر و گوتی:

ئەم مۆندیالە بۆ هەموو کەسێک قورس بووە. فەڕەنسا هێشتا تیمێکی زۆر مەترسیدارە، بەڵام بەرامبەر پاراگوای زەحمەتی کێشا. ئیسپانیا لە پۆرتوگالی بردەوە، بەڵام ئەوانیش ناچار بوون بۆ ئەو سەرکەوتنە رەنجێکی زۆر بدەن. هیچ تیمێک ئەو ئاستەی نەپاراستووە کە پێش مۆندیال نیشانی دابوو، چونکە رکابەرەکانیش یاری دەکەن. دۆخەکان لە مۆندیالەکانی پێشوو جیاوازن.

ئەو هاوكات ئاماژەی بە چەند هۆکارێک کرد وەکوو خشتەی قورسی یارییەکان، گەشتکردن، کەشوهەوا و جیاوازیی دۆخی چیمەنتی یاریگاکان، گوتیشی:

زۆربەی ئەو یاریزانانەی کە ئەمساڵ ژمارەیەکی زۆر یارییان کردووە هەست بە ماندوییەتی دەکەن و لەبەر ئەوەشە پێم وانییە ئاستی گشتی بەو شێوازە بێت کە راهاتووین بیبینین.

لە کاتی قسەکردنی بە تایبەتی سەبارەت بە ئیسپانیا، سکالۆنی ستایشی بەرەوپێشچوونی ئەوانی کرد لە تەواوی پاڵەوانییەتییەکەدا و گوتی:

ئیسپانیا یاری دوای یاری لە ماوەی پێنج یارییەکەیاندا بەرەوپێشچوونی بەخۆوە بینیوە، بەڵام بە بەردەوامی نایاب نەبوون. ئەمە نیشانی دەدات کە ئەم مۆندیالە چەندە قورسە بەهۆی گەشتکردن، گەرما و جیاوازیی چیمەنی یاریگاکانەوە. لەبەر ئەوەشە بەربژێرە سەرەکییەکان نەیانتوانیوە جیاوازییەکی گەورە لەنێوان خۆیان و ئەوانی دیکەدا دروست بکەن.

سکالۆنی هاوكات پشتڕاستی کردەوە کە لیاندرۆ پارێدێس بۆ پێکهاتەی سەرەکی دەگەڕێتەوە. راهێنەرەکەی ئەرجەنتین روونی کردەوە کە ئەو یاریزانەی هێڵی ناوەڕاست هاوسەنگییەکی جیاواز بە تیمەکەی دەبەخشێت و گوتی:

پارێدێس بەردەستە و یاری دەکات. کاتێک بەرامبەر کەیپ ڤێرد هاتە نێو یاریگا، تیمەکە بە شێوازێکی جیاواز کاری کرد. ئالێکسیس ماک ئالیستەر لە تەواوی ئەم مۆندیالەدا کارێکی باوەڕپێنەکراوی کردووە، بەڵام لەگەڵ پارێدێسدا ئێمە ئاسوودەترین و دەتوانین پاسی ستوونیی زیاتر بدەین. لیاندرۆ بە پێکانەوە گەیشت. ئەگەر ئەو بە تەواوی ئامادە بووایە، یاریی دەکرد. بەداخەوە، ئەو پێکانەکەی دوای دوایین یاریی لە جامی کۆپا لیبەرتادۆرێس لەگەڵ بوكا جۆنیۆرز تووش بوو. ئالێکسیس جێگرەوەیەکی نموونەیی بووە، چونکە ئێنزۆ فێرناندێز بە گشتی لە پێگەیەکی پێشکەوتووتردا بۆ یانەکەی یاری دەکات. هۆکاری سەرەکیی گۆڕانکارییەکە هەمیشە پێکانەکەی لیاندرۆ بووە.

رێزگرتن لە میسر

لە کۆتاییدا، سکالۆنی هۆشداریی لە کەم سەیرکردنی رکابەری داهاتووی ئەرجەنتین دا و گوتی:

میسر تیمێکی باشە. ئەوان تۆپی پێیەکی باش دەکەن، ناسنامەیەکی روونیان هەیە، راهێنەرێکی باش و یاریزانی خاوەن کوالێتییان هەیە. راستە ئەوان تەنیا یەک یارییان بردووەتەوە، بەڵام ژیانیان بۆ هەموو رکابەرێک قورس کردووە. هاوكات ئەوان تیمێکن کە لە پێگەیەکی بەرزتری یاریگا بە بەراورد بە کەیپ ڤێرد یاری دەکەن چونکە یاریزانی توانای هێرشبەرییان هەیە.