ئانچێلۆتی نەیتوانی بەرازیل رزگار بکات؛ نێیمار بە گریانەوە ماڵئاوایی لە مۆندیال کرد و بڕیاری وازهێنانی یەکجاری راگەیاند

یاریگا –

وێنەی گریانە بەکوڵەکەی نێیمار دا سیلڤا لەسەر یاریگا دوای فیکەی کۆتایی، پێشوەختە بووەتە بەشێک لە مێژووی رەشی تۆپی پێی بەرازیل.

هەڵبژاردەی بەرازیل لە قۆناخی 16ـی مۆندیال بەرامبەر نەرویج کرایە دەرەوە، ئەمەش شکستی پڕۆژەیەک بوو کە ئەستێرە تەمەن 34 ساڵییەکەی لە لێواری ماڵئاواییکردنی نێودەوڵەتی و بە بێ بەدەستهێنانی نازناوە چاوەڕوانکراوەکە هێشتەوە.

کێشە جەستەییەکان و بەشدارییەکی کەم
هێرشبەرەکەی سیلیساو بە بارودۆخێکی جەستەیی زۆر لاوازەوە گەیشتە پاڵەوانێتییەکە و ئەم لاوازییە وایکرد دوو یاریی یەکەمی قۆناخی کۆمەڵەکان لەدەست بدات، بەشدارییەکانی دواتریشی زۆر کەم بوون؛ چەند خولەکێکی کەم بەرامبەر سکۆتلاند یاری کرد و بەرامبەر ژاپۆنیش نەچووە نێو یاریگاوە.

دواین دەرکەوتن بەرامبەر نەرویج
لە یارییە یەکلاییکەرەوەکەدا بەرامبەر نەرویج، کارلۆ ئانچیلۆتی لە کۆتا خولەکەکاندا نێیماری هێنایە نێو یاریگاوە بۆ ئەوەی بگەنە قۆناخی چارەکی کۆتایی، بەڵام هیچ کاریگەرییەکی نەبوو. ئامادەبوونی لە یاریگادا تەنیا وەکوو ناو بوو؛ بەدەگمەن بەر تۆپ دەکەوت و نەیتوانی ئەو یاریزانە جیاوازە بێت کە بەرازیل پێویستی پێی بوو بۆ پێچەوانەکردنەوەی دۆخەکە، تەنیا بەشدارییەکی بەرچاوی، گۆڵێک بوو بە لێدانی سزا کە وەکوو ماڵئاواییەک لە مۆندیال وابوو.

قەیرانی بەرازیل و کۆتایی سەردەمێک
کرانەدەرەوە شەرمەزارکەرەکەیان بەرامبەر نەرویج، قەیرانی هەڵبژاردەی بەرازیلی قووڵتر کردەوە، کە لە دوای بەدەستهێنانی دوایین ئەستێرەی لە ساڵی 2002ـەوە لە مۆندیالەکاندا بێ ئامانج و سەرگەردانە.

ئێستا رەخنەکان راستەوخۆ ئاراستەی کارلۆ ئانچێلۆتی دەکرێن، کە تۆمەتبار دەکرێت بەوەی نەیتوانیوە کەسایەتی یان شێوازی یاریکردنی کێبڕکێکارانە بەم کۆمەڵە یاریزانە ببەخشێت.