پلانی ئافێلای؛ پڕۆژە درێژخایەنەکەی مەغریب و دروستبوونی مشتومڕ لەسەر هەڵوێستی ئەستێرەیەکی هۆڵەندا
دڵم لەگەڵ مەغریبە
یاریگا –
مەغریب بە بێدەنگی جەنگێکی گرنگی لە دەرەوەی یاریگا بردووەتەوە. ستراتیژییەکەی بۆ راکێشانی یاریزانانی لەدایکبووی هۆڵەندا کە خاوەن رەچەڵەکی مەغریبین، تیمی نیشتمانیی سەرلەنوێ دارشتووەتەوە و گرنگییەکی دیکە بە رووبەڕووبوونەوەی مۆندیال لە بەرامبەر هۆڵەندا دەبەخشێت.
رووبەڕووبوونەوەی مۆندیال لەنێوان هۆڵەندا و مەغریب زۆر لە سەرووی تۆپی پێوەیە. یارییەکە لە مۆنتێری نوێنەرایەتی رووبەڕووبوونەوەیەکی کولتووری و کۆمەڵایەتی لەنێوان دوو نەتەوەدا دەکات کە بەهۆی کۆمەڵگەیەکی گەورەی مەغریبییەوە لە هۆڵەندا دەژین بەستراونەتەوە.
شارەکانی وەکوو ئەمستەردام و دێنهاخ ماڵی هەزاران هاوڵاتی خاوەن رەچەڵەکی مەغریبین، ئەمەش ئەم یارییە دەکاتە یەکێک لە پڕهەستترین یارییەکانی پاڵەوانییەتییەکە. یارییەکە هاوکات مشتومڕێکی لەمێژینە سەبارەت بە یاریزانانی خاوەن دوو رەگەزنامە و ئەو وڵاتەی کە لە کۆتاییدا بۆ نوێنەرایەتیکردن هەڵیدەبژێرن زیندوو دەکاتەوە.
بۆ چەندین ساڵ، تیمی نیشتمانیی هۆڵەندا سوودی لە یاریزانانی خاوەن میراتی مەغریبی بینی. یاریزانانی وەکوو ئیبراهیم ئافێلای، خالید بۆلاهرۆز و ئادەم ماهیر بڕیاریاندا یاریی بۆ هۆڵەندا بکەن، ئەمەش وای لە بەرپرسانی تۆپی پێی مەغریب کرد سەرلەنوێ بیر لە پەیڕەوی خۆیان بکەنەوە.
مەغریب بە دامەزراندنی پێکهاتەیەکی سکاوتینگ و وەرگرتن لە هۆڵەندا وەڵامی دایەوە، لە رێگەی چاودێریکردنی وردی ئەو لاوە بەهرەمەندانەی کە خاوەن رەچەڵەکی مەغریبین. ئامانجەکە دڵنیابوونەوە بوو لەوەی کە یاریزانەکان پێش بڕیاردانی کۆتایی، هەردوو بژاردە نێودەوڵەتییەکە رەچاو بکەن.
ستراتیژییەکە ئەنجامی ناوازەی بەدەستهێناوە. ئەستێرەکانی وەکوو حەکیم زیاش رێگەکەیان خۆش کرد، لە کاتێکدا ئەو یاریزانانەی لە هۆڵەندا لەدایکبوون وەکوو سوفیان ئامرابت، نوسەیر مەزراوی و ئەنەس سەڵاحەدین بوونەتە ئەندامانی سەرەکی شێرەکانی ئەتڵەس.
لەگەڵ دەرکەوتنی چەندین بەهرەمەندی دواڕۆژ لە رێگەی ئاستەکانی لاوانەوە، ستراتیژی وەرگرتنی درێژخایەنی مەغریب بەردەوامە لە بەرهەمهێنان. ئەو پڕۆژەیەی کە بە “پلانی ئافێلای” دەناسرێت بووەتە یەکێک لە گەورەترین سەرکەوتنەکانی وڵاتەکە لە دەرەوەی یاریگا و لایەنێکی سەرنجڕاکێشی دیکە بە رووبەڕووبوونەوەی چاوەڕوانکراوی مۆندیال لە بەرامبەر هۆڵەندا دەبەخشێت.
هاندەری کامیان دەبیت، هۆڵەندا یان مەغریب؟
ئیبراهیم ئافێلای، یاریزانی پێشووی نێودەوڵەتی هۆڵەندا کە 53 یاریی بۆ ئۆرانج کردووە، پشتگیریی خۆی بۆ هەڵبژاردە ئەفریقییەکە راگەیاندووە پێش رووبەڕووبوونەوەی قۆناخی 32ـی مۆندیالی 2026.
مشتومڕ لە هۆڵەندا سەریهەڵداوە دوای ئەو لێدوانانەی کە لەلایەن ئیبراهیم ئافێلای، یاریزانی پێشووی بارسێلۆنا و یاریدەدەری ئێستای پیتەر بۆش لە ئایندهۆڤن دراون، پێش یاریی قۆناخی 32ـی مۆندیالی 2026 لەنێوان هۆڵەندا و مەغریب.
یاریزانەکەی پێشووی بارسێلۆنا، کە لەماوەی کاروانی وەرزشی خۆیدا نوێنەرایەتی یانەکانی وەکوو ئایندهۆڤن، شالکە و ستۆک سیتی کردووە، رایگەیاندووە کە لەم یارییەدا پشتگیری لە مەغریب دەکات، کە بەرەبەیانی رۆژی سێشەممە، کاتژمێر 04:00 بە کاتی هەولێر بەڕێوەدەچێت.
ئافێلای لە چاوپێکەوتنێکدا لەگەڵ NOS گوتی:
بۆ ئەم یارییە بە دیاریکراوی، دڵم لەگەڵ مەغریبە، تەنیا لەبەر ئەوەی رەچەڵەکم مەغریبییە. دایک و باوکم خەڵکی مەغریبن و خێزانەکەم لەوێ دەژین. پێویستم بە چ پاڵنەرێکی زیاترە؟ دەزانم زۆر کەس ئەمە بە خراپ وەردەگرن. منیش لێرە گەورە بووم و بێئەندازە سوپاسگوزاری هۆڵەندام. بەڵام دڵم لەکوێیە، ئارەزووی من بۆ کوێیە؟ مەغریب.
هێرشبەرەکەی پێشوو 53 یاریی بۆ تیمی نیشتمانیی هۆڵەندا کرد و لەنێوان ساڵانی 2007 و 2016 لە دوو یۆرۆ و مۆندیالێکدا یاریی کرد.
لەماوەی قۆناخی کۆمەڵەکاندا، ئەو پشتگیریی لە هۆڵەندای رۆناڵد کۆمان دەکرد و دەڵێت ئەگەر لە پاڵەوانییەتییەکەدا قۆناخی زیاتر ببڕن، بەردەوام دەبێت. بەڵام، بۆ رووبەڕووبوونەوەی بەرامبەر مەغریب، هەستەکانی روونن سەرەڕای ئەوەی بۆ چەندین ساڵ درێسی ئۆرانجی پۆشیوە و دەشڵێت:
من زۆر سوپاسگوزاری هۆڵەندام، بەڵام ئەمە بەهۆی ئاست و تواناکانی خۆمەوە بوو. من بۆ تیمی نیشتمانیی هۆڵەندا دەستنیشان نەکراوم لەبەر ئەوەی کەسێکی باشم، دەستنیشان کرام چونکە شایەنی بووم.
وەکوو ئەوەی ئافێلای خۆی پێشبینی دەکرد، لێدوانەکانی بە باشی لە هۆڵەندا وەرنەگیران.
ئافێلای رەخنەی توندی لە تۆڕە کۆمەڵایەتییەکاندا لەلایەن هاندەرانی هۆڵەندییەوە لێگیراوە، بە شێوەیەک زۆر کەس لێدوانەکانی ئەم ئەندامەی ستافی راهێنەرایەتی ئایندهۆڤن وەکوو ناپاکی بەرامبەر بەو وڵاتە لێکدەدەنەوە، کە دەرفەتی پێبەخشی بۆ کێبڕکێکردن لە گەورەترین پاڵەوانییەتییە نێودەوڵەتییەکانی جیهاندا.
Who are you supporting, really?
Affelay : “For this particular match, my heart is with Morocco.”
Can you explain why?
Afellay: My roots are in Morocco, my parents are from there, and my family lives there. What more of an explanation do I need to give?
(1/2) pic.twitter.com/yInflWhIxY
— 11LIONS.NL🦁 (@11LionsNL) June 28, 2026
