وەکوو چیمەنی دەستکردە؛ ناڕەزایەتی لەسەر چیمەنی یاریگاکانی مۆندیال دروست دەبێت

یاریگا –

ستۆڵ سۆلباکنی راهێنەری نەرویج رەخنە لە چیمەنی یاریگای مێتلایف دەگرێت، بەڵام جەخت دەکاتەوە کە ئەمە بیانوو نییە و پێویستە هەمووان خۆیان بگونجێنن.

ستۆڵ سۆلباکنی راهێنەری نەرویج رایگەیاند کە چیمەنی یاریگای مێتلایف هەستی نزیکەی وەکوو چیمەنی دەستکرد دەبەخشێت، ئەگەرچی ئەو جەختی لەوەش کردەوە کە ئەمە بیانوو نییە و پێویستە هەموو تیمەکان خۆیان لەگەڵیدا بگونجێنن. سۆلباکن لە کۆنگرەیەکی رۆژنامەوانیدا پێش دووەم یاریی نەرویج لە کۆمەڵەی I لە بەرامبەر سێنیگال گوتی:

لەژێرەوە چینێکی کورتی گیای رەق هەیە کە تاوەکوو رادەیەکی زۆر هەست دەکەیت وەکوو چیمەنی دەستکردە. پێویستە خۆمان لەگەڵیدا بگونجێنین. ئەمە پەیوەیستە بەوەی هەر کەسێک چ جۆرە چیمەنێکی بەدڵە. هیوادارم باران ببارێت تاوەکوو یارییەکە باشتر بڕوات، بەڵام ئەمە بیانوو نییە.

کاتێک سەبارەت بە ئێرلینگ هالاند پرسیاری لێکرا، کە دوو گۆڵی لە یەکەم یاریی خۆیدا لە مۆندیال کردبوو، سۆلباکن رایگەیاند کە بەپێی چۆنیەتیی گەشەکردنی پاڵەوانییەتییەکە، هێرشبەری نووک دەکرێت ببێتە یەکێک لە ئەستێرەکانی کێبڕکێکە.

راهێنەرەکە لە کاتی قسەکردنی لەسەر لیۆنێل مێسی گوتی:

مێسی بۆ چەندین ساڵە لە بەرزترین ئاستدا یاری دەکات. جێگرتنەوەی ئەو زۆر قورس دەبێت.

یاریزانی هێڵی ناوەڕاست، مۆرتن تۆرسبی بە هەمان شێوە رەخنەی لە رووی چیمەنەکە گرت بەڵام سەیری لایەنە ئەرێنییەکەی کرد و گوتی:

زۆرێک لە یاریزانانی نەرویج راهاتوون لەسەر یاریگای چیمەنی دەستکرد یاری بکەن.

ئەم ناڕەزایەتییانەی لەسەر چیمەنی یاریگای مێتلایف هاوکاتە لەگەڵ ئەو رەخنانەی پێشووتر کە لەلایەن یاریزانانی وەک ڤینیسیۆس جونیۆر و ئادریان رابیۆوە گیرابوون، کە هەردووکیان ناڕەزایەتیی خۆیان دەربڕی دوای ئەنجامدانی یاری لەم یاریگایەی نیویۆرک/نیوجێرزی.