ستەممان لێ کراوە؛ جەزائیر لای فیفا سکاڵا لە دژی ئەرجەنتین تۆمار دەکات

بەگوێرەی راپۆرتی میدیاکانی جەزائیر، بەتایبەت پێگەی TSA، فیدراسیۆنی تۆپی پێی جەزائیر سکاڵاکەی لەسەر دوو رووداوی سەرەکیی نێو یارییەکە بووە.

لێدانەکەی مێسی لە خولەکی 32
لە کاتی ململانێیەکدا، لیۆنێل مێسی بەتوندی قاچی خستە سەر قاچی عیسا ماندی، بەرگریکاری جەزائیر و لە سکاڵاکەدا هاتووە، ئەم رەفتارە مەترسیدارە دەبوو کارتی سووری راستەوخۆی بۆ مێسی لێ بکەوێتەوە، ئەوان تووڕەن کە مێسی تەنانەت کارتی زەردیشی پێ نەدراوە.

ئانیشکەکەی ماک ئالیستەر لە خولەکی 74
ئالێکسیس ماک ئالیستەر، یاریزانی هێڵی ناوەڕاستی ئەرجەنتین، بە ئانیشک کێشای بە دەموچاوی ئیبراهیم مازا، یاریزانی جەزائیر و ئەم بڕیارەش لەلایەن ناوبژیوانەوە بێ هیچ سزایەک تێپەڕی، بۆیە جەزائیر ئەم بڕیارەشی بە نادادپەروەرانە دەزانێت و پێی وایە دەبوو بێ سزا تێنەپەڕێت.

تاوەکوو ئێستا فیفا هیچ وەڵامێکی فەرمی بۆ داواکارییەکەی جەزائیر نەداوەتەوە، بەڵام لە رووی مێژووییەوە، زۆر دەگمەنە سکاڵای لەم شێوەیە ئەنجامی گەورە یان سزای قورسی لێ بکەوێتەوە.