یاریگا –
گاڤی، ئەستێرەی هێڵی ناوەڕاستی یانەی بارسێلۆنا، بە شێوازی راشکاوانە و ناسراوی خۆی، هاتە سەر هێڵ و قسەی لەسەر ئەو پشێوییە گەورەیە کرد کە لەم دواییانەدا لە ژووری خۆگۆڕینی ریال مەدریددا روویدا، کە تێیدا ئۆرلیەنن چوامێنی و فێدێ ڤاڵڤێردی بە توندی بەگژیەکداچوون.
لە دیمانەیەکی تایبەتدا لەگەڵ رۆژنامەی مۆندۆ دێپۆرتیڤۆ، گاڤی شرۆڤەی ئەو شەڕەی کرد کە دوو رۆژ لەسەریەک لە مەشقەکانی ریال مەدرید دووبارە بووەوە و تێیدا ڤاڵڤێردی بەهۆی بریندارییەوە رەوانەی نەخۆشخانە کرا و کارگێڕیی یانەی شاهانەش بە بڕی نیو ملیۆن یۆرۆ سزای بەسەر هەردوو یاریزانەکەدا سەپاند.
🚨 ENTREVISTA EXCLUSIVA MD
👊 Gavi se ‘moja’ sobre la gestión de la pelea entre Tchouaméni y Valverde@martinezferran🤝@angelperezpxhttps://t.co/fgZXhgYzA4
— Mundo Deportivo (@mundodeportivo) May 19, 2026
ئەگەر کار گەیشتە شەڕەبۆکس، دەبوو راهێنەر یارییان پێ نەکات
من لەو بڕوایەدام کە کێبڕکێ و ئاڵۆزی لە کاتی مەشقەکاندا لە نێوان هاوتیپەکاندا شتێکی سرووشتییە و نیشانەی رکابەرییە، ئەمەش تاڕادەیەک باشە، بەڵام کاتێک کار دەگاتە دەست لێوەشاندن و شەڕەبۆکس، لێرەدا دەبێت راهێنەر سزای توند بدات و یاری بەو یاریزانە نەکات.
ئەستێرە لاوەکەی بارسا رەخنەی ئاڕاستەی بڕیارەکەی راهێنەری مەدرید کرد و گوتی؛
ئەگەر راست بێت کە کار گەیشتووەتە شەڕی جەستەیی، بە بڕوای من راهێنەر هەڵەی کرد کە چوامێنی بۆ کلاسیکۆ بانگهێشت کردەوە و یاریی پێکرد. هەرچەندە من لایەنی تەواوی رووداوەکە نازانم.
وەڵامێک بۆ رەخنەکانی مەدرید: شانازی بە لاماسیاوە دەکەین
کاتێک لێی پڕسیرا لەسەر ئەوەی کە لە مەدریدەوە هەمیشە هەوڵی کەمکردنەوەی بەهای دەستکەوتەکانی بارسێلۆنا دەدرێت، گاڤی بە توندی بەرپەرچی دانەوە و گوتی؛
ئەمە هەمیشە بەو شێوازە دەبێت. هەموو جیهان دەزانێت کە لە مەدریدەوە هەمیشە دەیانەوێت نرخ و گرنگی ئەو نازناوانە کەم بکەنەوە کە ئێمە دەیبەینەوە. ئەمە بۆ ئێمە گرنگ نییە.
ئەستێرە ئیسپانییەکە زیاتر لەسەر ئەو بابەتە دوا و گوتی؛
بردنەوەی دوو لالیگای لەسەریەک، بە پشت بەستن بە کوڕانی نێو ماڵەکەمان و ئەستێرەکانی ئەکادیمیای لاماسیا، بەبێ گرێبەستی گەورە، بەهایەکی بێپایانی هەیە. لە کاتێکدا تیپەکانی دیکە ساڵانە پارەیەکی خەیاڵی بۆ کڕینی یاریزان خەرج دەکەن، ئێمە شانازی بە پڕۆژەکەی خۆمانەوە دەکەین.
