گرژییەکی نوێ؛ ئێمباپێ تۆڵە لە بەرەی دژە ئاڵۆنسۆ دەکاتەوە

یاریگا –

لە ژووری خۆگۆڕینی ریال مەدرید، ئێمباپێ دۆخەکە دەتەقێنێتەوە.

وەکوو دەگوترێت، کیلیان ئێمباپێ دوای یارییەکەی بەرامبەر ریال ئۆڤیدۆ بووەتە هۆی دروستبوونی گرژی زیاتر لەنێو ژووری خۆگۆڕینی ریال مەدرید، ئەمەش کێشەی زیاتری بۆ وەرزە سەختەکە دروست کردووە.

بەگوێرەی رۆژنامەی سپۆرت، هێرشبەرە فەرەنسییەکە هەوڵیداوە رووبەڕووی میدیاکان ببێتەوە دوای ئەوەی لە لایەن هاندەرانی یانەکەی خۆیەوە فیکەی ناڕەزایەتی توندی بۆ لێدرا، بەڵام لێدوانەکانی تەنیا کەشی دەوری تیمەکەی خراپتر کرد.

سەرچاوەکە بانگەشەی ئەوە دەکات کە ئێمباپێ بۆ چەندین هەفتەیە لە ململانێیەکی نێوخۆییدایە لەگەڵ یانەکە و لێدوانەکانی رۆژی پێنجشەممەی رەنگدانەوەی تووڕەییەکی بەردەوام بوون، سەبارەت بە رووداوەکانی سەرەتای وەرزەکە. بە تایبەتی دەگوترێت هێشتا هەست دەکات لە لایەن چەند یاریزانێکی خاوەن هەژموونی نێو ژووری خۆگۆڕینەوە ناپاکی لێکراوە، بەهۆی ئەو شێوازەی کە کۆتایی بە سەردەمی چابی ئالۆنسۆ هێنا لە یانەکەدا.

سەرەتای ناکۆکییەکان و جیابوونەوەی تیمەکە

ئەو دابەشبوونەی بێو پێکهاتەی ریال مەدرید کە باسی لێوە دەکرێت، لەو کاتەوە دەستی پێکرد کە ڤینیسیۆس جۆنیۆر بە ئاشکرا بەرهەڵستی چابی ئالۆنسۆی کرد. یانەکە بڕیاریدا سزای یاریزانە بەرازیلییەکە نەدات و لەو ساتەوە، ئەو یاریزانانەی دژی راهێنەرەکە بوون، وەکوو دەگوترێت هەژموونیان لەنێو گروپەکەدا بەدەست هێنا.

بەگوێرە راپۆرتەکان، دۆخەکە دوای شکستی ریال مەدرید بەرامبەر بارسێلۆنا لە یاریی کۆتایی جامی سوپەری ئیسپانیا تەقیەوە، شکستێک کە لە کۆتاییدا بووە هۆی جێهێشتنی یانەکە لە لایەن چابی ئالۆنسۆوە. پێدەچێت ئێمباپێ ئەو رووداوانەی لەبیر نەکردبێت. وتارەکە ئاماژە بە چەند لێدوانێکی دەکات کە دوای یارییەکەی ئۆڤیێدۆ داویەتی، وەکوو پەیامی ناڕاستەوخۆ کە ئاراستەی هەندێک لە هاوتیمەکانی و خودی یانەکە کراون.

ئێمباپێ دوای ئەوەی لێیان پرسی بۆچی لە سەرەتاوە یاریی نەکرد، گوتی:

لە راهێنەر بپرسن… دەتانەوێت چی بڵێم؟ ئامادە بووم سەرەکی بم، بەڵام ئەمە بڕیاری ئەوە. من ناتوانم لە راهێنەرەکە تووڕە بم؛ هەمیشە دەبێت رێز لە بۆچوونی راهێنەر بگیرێت. پێم باشترە لێرە قسە بکەم. دەزانم زۆر کەس هەن قسە ناکەن و من دەبێت رۆژنامەکان بخوێنمەوە بۆ ئەوەی بزانم ئەوان چۆن بیر دەکەنەوە. پێم باشترە خۆم شتەکان بڵێم. بەو شێوازە ئاسانتر و روونترە.

راپۆرتەکە ئەم لێدوانانە وەکوو نیشانەی ئەو بێهیوایی و بێزارییە لێکدەداتەوە، کە ئێمباپێ بۆ چەندین مانگە لەگەڵ خۆیدا هەڵیگرتووە.

سەردەمی ئاربێلوا و دروستبوونی دوو بەرە

یەکێک لە سەرچاوە سەرەکییەکانی گرژییەکە، وەکوو دەگوترێت پەیوەندی ڤینیسیۆس جۆنیۆر بوو لەگەڵ چابی ئالۆنسۆ. بەگوێرەی راپۆرتەکە، راهێنەرەکە بە روونی ئێمباپێی وەکوو ئەستێرەی سەرەکی خۆی هەڵبژاردبوو، ئەمەش شتێک بوو کە ڤینیسیۆس بە باشی قبووڵی نەکرد، دوای ئەوەی چەندین جار خرایەسەر کورسی یەدەک یان گۆڕانکاری پێکرا.

بەڵام لەگەڵ ئالڤارۆ ئاربێلوا، وەکوو دەگوترێت شتەکان گۆڕان. راهێنەری ئێستا بەگوێرەی راپۆرتەکان هەوڵیداوە پەیوەندییەکان لەگەڵ ئەو یاریزانانەدا بنیاد بنێتەوە کە رەخنەیان لە چابی ئالۆنسۆ هەبوو، بە تایبەتی ڤینیسیۆس. سەرچاوەکە بانگەشەی ئەوە دەکات کە ڤینیسیۆس یەکێکە لەو کەمە یاریزانانەی کە ئاربێلوا هیچ کێشەیەکی لەگەڵیاندا نەبووە، لەپاڵ جود بێلینگهام و فێدی ڤاڵڤێردی.

ئێمباپێ هەروەها وەکوو بەرگریکارێک لە چابی ئالۆنسۆ دەرکەوت، لە کاتێکدا بە شێوەیەکی ناڕاستەوخۆ رەخنەی لە ئاربێلوا گرت کاتێک گوتی:

ئەمە زۆر ئازارمان دەدات چونکە هەست دەکەم پێکهاتە و بیرۆکەیەکی یاریکردنمان هەبوو… و لەدەستماندا.

راپۆرتەکە دەڵێت گرژییەکە ئێستا لە تۆپی پێ زیاتر رۆیشتووە. پەیوەندی نێوان گەورەترین ئەستێرەکانی تیمەکە لە مانگەکانی دواییدا زۆر ساردتر بووەتەوە. لەنێو ژووری خۆگۆڕیندا دوو گروپی روون هەن:

• گروپی یەکەم: ئەو یاریزانانەی پاڵپشتی چابی ئالۆنسۆیان دەکرد.

• گروپی دووەم: ئەو یاریزانانەی کە دەیانویست گۆڕانکاریی روو بدات.

بەگوێرەی سەرچاوەکە؛ ڤینیسیۆس، بێلینگهام و ڤاڵڤێردی سەر بە گروپی دووەمن و ئێستا بە هەموو توانایانەوە پاڵپشتی ئاربێلوا دەکەن.

نەبوونی لێکتێگەیشتن لەنێو یاریگادا

لە کاتی یارییەکەی بەرامبەر ئۆڤیدۆ، نەبوونی لێکتێگەیشتن لەنێوان ئێمباپێ و بێلینگهامدا وەکوو دەگوترێت دیار بوو. ئەو دووانە بە دەگمەن لەنێو یاریگادا پێکەوە یارییان دەکرد، پەیوەندییەکی کەمیان نیشاندا و ئێمباپێ زیاتر لە هەمیشە بە گۆشەگیر دەرکەوت. پەیوەندی ئەو لەگەڵ ڤینیسیۆسیش بە زۆر ساردتر لە جاران وەسف کراوە.

راپۆرتەکە بەوە کۆتایی دێت کە ئێمباپێ هەست دەکات چەندین هاوتیمی دژی چابی ئالۆنسۆ وەستاونەتەوە و بەشدار بوون لە تێکدانی وەرزەکە. بڕیاری ئەو بۆ قسەکردن بە ئاشکرا دوای یارییەکە وەکوو ئاڵەنگارییەکی راشکاوانە بۆ خودی ریال مەدرید نیشان دەدرێت.