یاریگا –
شەش لە باشترین راهێنەرەکانی پرێمەرلیگ بۆ وەرزی 2025/26 پاڵێوراون بۆ خەڵاتی باشترین راهێنەری وەرز.
کیس ئەندروز، میکێل ئارتێتا، مایکڵ کاریک، پێپ گواردیۆلا، ئاندۆنی ئیراولا و رێجیس لۆ بریس بەربژێرەکانن. هاندەران تاوەکوو رۆژی دووشەممە 18ـی ئایار کاتژمێر 12:00 بە کاتی بەریتانیا دەرفەتی دەنگدانیان هەیە. دەنگی خەڵک لەگەڵ دەنگی لیژنەیەکی پسپۆڕی تۆپی پێ تێکەڵ دەکرێت بۆ دیاریکردنی براوەی کۆتایی.
لێرەدا کورتەیەک لە کارەکانی ئەم راهێنەرانە دەخەینەڕوو:
کیس ئەندرۆز – برێنتفۆرد
یاری: 36 | بردنەوە: 14 | یەکسانبوون: 9 | دۆڕان: 13 | گۆڵکردن: 52 | گۆڵ لێکران: 49 | جیاوازیی گۆڵ: +3
دوای ئەوەی لە هاویندا شوێنی تۆماس فرانکی گرتەوە (کە چوو بۆ تۆتنهام)، ئەندروز وەرزێکی سەرسوڕهێنەری بەڕێکرد. شێوازێکی جوانی یاریکردنی بەسەر برێنتفۆرددا چەسپاند و کێبڕکێی بۆ گەیشتن بە شەش پلەی پێشەوە کرد، لەو رێگەیەشدا توانی لە یانەکانی مانچێستەر یونایتد، لیڤەرپوول و ئاستۆن ڤێلا بباتەوە.
میکێل ئارتێتا – ئارسیناڵ
یاری: 36 | بردنەوە: 24 | یەکسانبوون: 7 | دۆڕان: 5 | گۆڵکردن: 68 | گۆڵ لێکران: 26 | جیاوازیی گۆڵ: +42
وەرزێکی مێژوویی بۆ ئارسیناڵەکەی ئارتێتا، کە زۆربەی کاتەکانی وەرزەکە لە پێشەنگ بوون بۆ بەدەستهێنانی یەکەم نازناوی پرێمەرلیگ لە دوای ساڵی 2003/04. ئارتێتا لە مانگی ئازاردا هەشتەمین خەڵاتی باشترین راهێنەری مانگی بردەوە. سەرەڕای دابەزینی ئاستیان لە مانگی نیسان، توانی تیمەکەی رێک بخاتەوە و بۆ یەکەمجار لە دوای 20 ساڵ بگەنە یاریی کۆتایی چامپیۆنزلیگ، هەروەها بە سێ بردنەوەی لەسەریەک بەبێ گۆڵ لێکران، چارەنووسی نازناوەکەی لە دەستی خۆیاندا هێشتەوە.
مایکڵ کاریک – مانچێستەر یونایتد
یاری: 15 | بردنەوە: 10 | یەکسانبوون: 3 | دۆڕان: 2 | گۆڵکردن: 27 | گۆڵ لێکران: 16 | جیاوازیی گۆڵ: +11
مانچێستەر یونایتد لە پلەی شەشەم بوو کاتێک کاریک لە ناوەڕاستی مانگی یەکدا (دوای رۆیشتنی روبێن ئامۆریم) ئەرکی راهێنەرایەتی گرتە ئەستۆ. ئاستێکی بڕواپێنەکراوی پێشکەش کرد و شەیتانەسوورەکانی گەیاندە پلەی سێیەم و مسۆگەرکردنی چامپیۆنزلیگی وەرزی داهاتوو. لەو کاتەوەی ئەو هاتووە، یونایتد لە پلەی یەکەمی ریزبەندی یانە ‘خاوەن باشترین ئەنجامەکان’ـە، بەجۆرێک کە 33 خاڵی لە کۆی 65 خاڵی یانەکە تەنیا لە 15 یاریدا بەدەستهێناوە.
Michael Carrick is nominated for the #PL‘s Manager of the Season award! 👏🇾🇪
— Manchester United (@ManUtd) May 14, 2026
پێپ گواردیۆلا – مانچێستەر سیتی
یاری: 36 | بردنەوە: 23 | یەکسانبوون: 8 | دۆڕان: 5 | گۆڵکردن: 75 | گۆڵ لێکران: 32 | جیاوازیی گۆڵ: +43
گواردیۆلا بۆ بەدەستهێنانی شەشەمین خەڵاتی باشترین راهێنەری وەرز کێبڕکێ دەکات. لە مانگەکانی شووبات و نیساندا خەڵاتی باشترین راهێنەری مانگی بردەوە (کە بوونە دوازدەیەم و سێزدەیەم خەڵات لە مێژوویدا). ئێستا تەنیا سێر ئالێکس فێرگسن (27 خەڵات) و ئارسن ڤینگەر (15 خەڵات) لە پێش ئەون لەڕووی ژمارەی خەڵاتی مانگانەوە.
ئاندۆنی ئیراولا – بۆرنمس
یاری: 36 | بردنەوە: 13 | یەکسانبوون: 16 | دۆڕان: 7 | گۆڵکردن: 56 | گۆڵ لێکران: 52 | جیاوازیی گۆڵ: +4
ئەم راهێنەرە ئیسپانییە چێژی لە سێیەم وەرزی خۆی لەگەڵ بۆرنمس بینی، کە ئێستا لە پلەی شەشەمدان و هەوڵی گەیشتن بە پاڵەوانییەتییە ئەوروپییەکان دەدەن. ئیراولا توانی بە سەرکەوتوویی قەرەبووی فرۆشتنی یاریزانە سەرەکییەکانی وەکوو دین هاوسن و ئەنتوان سێمێنیۆ بکاتەوە و گەشە بە بەهرەمەندە گەنجەکانی وەکوو جونیۆر کروپی و رایان بدات.
رێجیس لۆ بریس – سەندەرلاند
یاری: 36 | بردنەوە: 12 | یەکسانبوون: 12 | دۆڕان: 12 | گۆڵکردن: 37 | گۆڵ لێکران: 46 | جیاوازیی گۆڵ: -9
دوای ئەوەی سەندەرلاندی گەیاندە پرێمەرلیگ، لۆ بریس بەردەوامە لە ئەنجامە سەرسوڕهێنەرەکان لە ‘ستادیوم ئۆف لایت’. توانیویەتی یانەکە بەرەو کۆتاییهێنان بە وەرزەکە لە نیوەی سەرەوەی ریزبەندی بەرێت. هەروەها بووە دووەم راهێنەر لە مێژووی سەندەرلاند کە بتوانێت لە هەردوو یاریی چوون و گەڕانەوەدا لە رکابەرە مێژووییەکەیان، نیوکاسڵ یونایتد بباتەوە.
