دێکۆ لەگەڵ بریکاری کارەکانی یاریزانێکی لاو کۆدەبێتەوە

یاریگا –

دیکۆ لەگەڵ بریکاری ئەستێرە لاوەکە کۆدەبێتەوە و بارسا بەدوای بژاردەکاندا دەگەڕێت.

دیکۆ پێنجشەممەی رابردوو کۆبوونەوەیەکی لەگەڵ خوانما لۆپێز، بەڕێوەبەری جێبەجێکاری کۆمپانیای نیاگارا سپۆرتس و بریکاری ڤیکتۆر مونۆزی هێرشبەریی بەهرەمەندی یانەی ئۆساسۆنا ئەنجامدا.

بەشی وەرزشی بارسێلۆنا لە هەفتەکانی دواییدا و دوای ماڵئاواییکردن لە خولی یانە پاڵەوانەکانی ئەوروپا، چالاکییەکانی زیادکردووە؛ ئەمەش بە مەبەستی ئەنجامدانی گۆڕانکاریی دیاریکراو لە پێکهاتەکەدا بۆ ئەوەی یانەکە لە ریزی یانە بژاردەکانی ئەوروپا بمێنێتەوە.

ئاستەنگەکانی بەردەم گواستنەوەی مونۆز

سەرەڕای پەیوەندییەکان، سەرچاوەکان ئاماژە بەوە دەکەن کە بۆ ئێستا ڕێککەوتنەکە زۆر ئاڵۆزە. یاریزانەکە کۆدەنگی تەواوی لە نێو یانەکەدا نییە، هەروەها دۆخی دارایی بارسا وا دەخوازێت کە یانەکە زۆر بە وریایی بژاردەکان هەڵبژێرێت. ئێستا لە پێشینەی کارەکان گواستنەوەی یاریزانێکی باڵە کە بتوانێت کاریگەریی یەکلاکەرەوەی لە یارییە گەورەکاندا هەبێت و لە ئاستە بەرزەکاندا خاوەن ئەزموون بێت.

ئاستەنگێکی دیکەی سەرەکی، تێوەگلانی یانەی ریال مەدریدە. باس لەوە دەکرێت کە یانە مەدریدییەکە خاوەنی %50ـی مافی گواستنەوەی داهاتووی یاریزانەکەیە و بە بڕی 8 ملیۆن یۆرۆ مافی کڕینەوەشی هەیە. ئەمەش بەو مانایەیە ئەگەر بارسێلۆنا مەرجی هەڵوەشاندنەوەی گرێبەستەکەی کە 40 ملیۆن یۆرۆیە کارا بکات، ئەوا ریال مەدرید 20 ملیۆن یۆرۆی بەردەکەوێت، ئەمەش وای کردووە پڕۆسەکە لە رووی ستراتیژییەوە گونجاو نەبێت.