یاریگا – رۆژنامەی مارکا
ئێنریکێ ریکێلمی و فلۆرێنتینۆ پێرێز لە ماوەی کەمپینی هەڵبژاردندا کۆمەڵێک ئەستێرەی گەورەیان کۆکردووەتەوە.
هەمیشە چاوەڕوان دەکرا ئەمە ببێتە خاڵی یەکلاکەرەوەی هەڵبژاردنەکان و بێهیوای نەکردین. ئەو ناوانەی کە ئێنریکێ ریکێلمی و فلۆرێنتینۆ پێرێز دەیانخەنە سەر مێزەکە بۆ بەهێزکردنی پڕۆژەکانیان، هەمیشە شێوازی کەمپینەکەیان دیاری دەکرد کە بە سستی دەستی پێکرد، بەڵام بە خێراییەکی تەواو کۆتایی دێت. تەنیا لە ماوەی پێنج رۆژدا، هەردوو بەربژێرەکە کۆمەڵێک ئەستێرەیان لە سەرجەم ئاستەکانی پێکهاتەی وەرزشیدا کۆکردووەتەوە بۆ باشترکردنی پڕۆژەکانیان و بەدەستهێنانی پاڵپشتی ئەندامانی ریال مەدرید. لە کۆی گشتیدا، 13 ناو هەڵبژاردنەکانیان هەژاندووە.
وەک قۆناخی کرانەدەرەوەی خولی پاڵەوانەکانی ئەورووپا، ریکێلمی و فلۆرێنتینۆ بە وریاییەوە دەستیان بە “یاریی” هەڵبژاردنەکە کرد. لە ماوەی رۆژانی سەرەتادا، هەردوو بەربژێرەکە زیاتر تۆمەتیان ئاڵوگۆڕ دەکرد و چەند پێشنیارێکی سەرنجڕاکێشیان پێشکەش دەکرد، وەکوو پڕۆژەی “شاری ئەندام” لە لایەن ریکێلمی کە کەمپینەکەی پێ دەستپێکرد. فلۆرێنتینۆ لە پشتپەردەدا مایەوە، وەکوو تیمێک کە بەرگری لە پێشەنگییەکی ئاسوودە دەکات و تەنیا خۆی سنووردار کردبوو بە تابلۆ ریکلامییە بەناوبانگەکان و وتارێکی رەخنەیی و هێرشبەرانە کە رکابەرەکەی بە “سەردەمی تاریکی کاڵدێرۆن” دەبەستەوە.
راوول گۆنزالێز و فێرناندۆ هیێرۆ
هموو شتێک گۆڕا کاتێک یەکەم ناو هاتە ناو کێبڕکێکەوە. ریکێلمی یەکەم کەس بوو کە گرێبەستێکی راگەیاند و ئەمەشی بە شێوازێکی گەورە کرد، لە رێگەی راگەیاندنی راوول گۆنزالێز وەکوو بەڕێوەبەری وەرزشیی پڕۆژەکەی. خاوەن درێسی ژمارە 7ـی ئەفسانەیی پێشوو بوو بە یەکەم ناوی گەورەی کەمپینەکە لە 1ـی حوزەیراندا.
ریکێلمی گوتی:
بۆ ئەم پڕۆژەیە و ئەو دۆخەی یانەکەی تێدایە، پێویستە بگەڕێینەوە بۆ ئەو بەهایانە، ئەو مەدریدزمۆیە، ئەو DNAـیە. دەبێت ئەفسانەیەکی ریال مەدرید بێت، کە لە لایەن پیشەگەرە گەورەکانەوە پاڵپشتی بکرێت. کەس وەکوو ئەو یانەکە ناناسێت. راوول گۆنزالێز کەسی گونجاوە بۆ سەرکردایەتیکردنی ئەو پڕۆژە وەرزشییەی کە بۆ ریال مەدرید دێت.
کەمێک دوای ئەوە، فێرناندۆ هیێرۆی وەکوو بەڕێوەبەری ئەکادیمیا راگەیاند، بەمەش پێکهاتەیەکی نوێی سەرکردایەتی تەواو کرد. دوو ئەفسانەی یانەکە هاتنە ناو کەمپینەکەوە.
هاڵاند، رۆدری و کلۆپ
دوای ئەنجامدانی کارەکان لە هۆڵی بەڕێوەبردن، ریکێلمی هەمان شتی لەنێو یاریگاش کرد. کاتی راگەیاندنی یاریزانان بوو و ئەو چووە سەر “مۆدی گالاکتیکۆ” لە رێگەی بانگەشەکردنی رێککەوتن لەگەڵ هاڵاند. ئەستێرە نەرویجییەکە بوو بە چەق و خاڵی سەرەکی کەمپینەکەی، ئەمەش دەنگدانەوەیەکی گەورەی دروستکرد. تەنانەت زیاتریش بەهۆی ئەوەی رۆدری “گرێبەستە دووانەکەی مانچێستەر سیتی” بۆ ریکێلمی تەواو کرد.
ریکێلمی بۆ زیادکردنی متمانە بە راگەیاندنەکەی گوتی:
ئەگەر نەتوانم هیچ کام لە بەڵێنەکانم سەبارەت بەم یاریزانانە (رۆدری و هالاند) جێبەجێ بکەم، من گەرەنتییەکم واژۆ کردووە کە تێیدا هاتووە خۆم بە کەسی 100%ـی سەرجەم شایستەی ئەندامییەتی بۆ هەموو ئەندامان لە وەرزی داهاتوودا دەدەم.
سەبارەت بە راهێنەرەکە، هاوکات ئەو ئەگەری هێنانی کلۆپی زیندوو کردەوە، کە پێش هەڵبژاردنەکان ناوی وەکوو یەکێک لە بژاردەکانی فلۆرێنتینۆ پێرێز بۆ جێگرتنەوەی ئالڤارۆ ئاربێلۆا دەهێنرا. ئێنریکێ ریکێلمی گوتی: “ئێمە هەوڵ دەدەین ئەو راهێنەرە بهێنین، کە هەموو هاندەرانی مەدرید دەیانەوێت بیبینن راهێنەرایەتی ریال مەدرید دەکات.”
جۆزێ مۆرینیۆ و کۆناتێ
راگەیاندنەکانی ریکێلمی فلۆرێنتینۆ پێرێزیان ناچار کرد وەڵام بداتەوە. بۆ بەرەنگاربوونەوەی رکابەرەکەی، فلۆرێنتینۆ بە فەرمی دوو گواستنەوەی نوێی راگەیاند کە پێشتر لە لایەن رۆژنامەی مارکاوە باس کرابوون. لە هەمان ئەو کاتەی کە ریکێلمی بۆمبە گەورەکانی خۆی ئاشکرا دەکرد، فلۆرێنتینۆ بۆمبەکەی خۆی پێشکەش کرد: جۆزێ مۆرینیۆ و ئیبراهیما کۆناتێ.
هیچ کام لەم ناوانە بە تەواوی چاوەڕواننەکراو نەبوون، بەڵام فەرمیکردنیان رێگەی بە فلۆرێنتینۆ دا بچێتە نێو کێبڕکێیەکەوە کە ریکێلمی نزیک بوو بە تەنیایی تێیدا پێشەنگ بێت. هەنگاوە سەرەتاییەکانی فلۆرێنتینۆ بریتی بوون لە راهێنەرێک و بەرگریکارێکی ئاستی باڵا بۆ بەهێزکردنی هێڵی بەرگرییەک کە زۆر کاریگەری خراپی لەسەر دروست ببوو.
ئیکەر کاسیاس و دێل بۆسکێ
لە کاتژمێرەکانی کۆتاییدا، ئێنریکێ ریکێلمی لە نامەیەکدا بۆ ئەندامانی ریال مەدرید پشتڕاستی کردەوە کە ئیکەر کاسیاس پێگەیەکی بەرپرسیارێتی لەناو پێکهاتەی بەڕێوەبردنەکەیدا دەبێت. گۆڵپارێزە ئەفسانەییەکە پەیوەندی بە راوول گۆنزالێز وەکوو بەڕێوەبەری وەرزشی و فێرناندۆ هیێرۆ وەکوو سەرۆکی ئەکادیمیاوە دەکات، بەمەش ئەوەی ریکێلمی پێی دەڵێت “سیانەی کاپتنەکان” بۆ رۆڵی بڕیاردانی ستراتیژی لەنێو یانەکەدا تەواو دەکات.
پاشان ڤیسێنتی دێل بۆسکێی زیادکرد و گوتی:
ئەو بە تەواوی بە شێوەیەکی لەخۆبوردووانە دەبێتە بەشێک لە پڕۆژەکەمان، تەنیا لەپێناو باشیی مەدریددا.
دومفریس و جواو نێڤێش، مایکڵ ئۆلیس، یان ڤیتینیا
فلۆرێنتینۆ پێرێز دوایین هەنگاوی نا بۆ هەژاندنی هەڵبژاردنەکان بە راگەیاندنێک کە پەرۆشییەکی گەورەی دروستکرد. جگە لە پشتڕاستکردنەوەی فەرمی رێککەوتنەکە بۆ بەرگریکاری باڵی ئینتەر، دێنزێل دومفریس، گەورەترین مانشێت لە بەڵێنی ئۆپەراسیۆنێکی مێژووییەوە هات.
سەرۆکی ئێستای ریال مەدرید لە لێدوانێک لە بەرنامەی تەلەفیزیۆنی هۆریزۆنتێ لەسەر کەناڵی کواترۆ دا و گوتی:
رۆژی سێشەممە، من گەورەترین ئۆفەر لە مێژووی یانەکەدا بۆ یاریزانێک پێشکەش دەکەم، کە نزیکەی 150 ملیۆن یۆرۆ دەبێت.
ئەم راگەیاندنە دەستبەجێ پێشبینییەکانی سەبارەت بە یاریزانی مەبەست وروژاند، کە تێیدا سێ ناو سەرکردایەتی گفتوگۆکە دەکەن؛ جواو نێڤێش، مایکڵ ئۆلیس، یان ڤیتینیا.
