دوایین زانیاریی لەسەر دۆخی جەستەیی لیۆ مێسی پێش دەستپێکردنی مۆندیال

یاریگا –

لیۆنێل سکالۆنی، راهێنەری ئەرجەنتین دوایین زانیارییەکان سەبارەت بە تەندروستیی لیۆنێل مێسی ئاشکرا دەکات.

بەگوێرەی لێدوانەکانی لیۆنێل سکالۆنی، راهێنەر لە رۆژی هەینی، لیۆنێل مێسی هەنگاوێکی دیکەی بەرەو چاکبوونەوە ناوە و دەکرێت لە یارییە دۆستانەکانی داهاتووی ئامادەکاری مۆندیالی ئەرجەنتین بۆ چەند خولەکێک بەشدار بێت.

راهێنەرە 48 ساڵانەکەی ئەرجەنتین گەشبینی خۆی بە باشتربوونی مێسی نیشاندا و گوتی:

لیۆ دۆخی باشە. بەشێک لە راهێنانە بەکۆمەڵەکان کردووە و چیدیکە بە تەواوی لە پێکهاتەی تیمەکە دانەبڕاوە. ئەگەری هەیە بۆ چەند خولەکێک لە یارییە دۆستانەکاندا یاری بکات. دەبینین ئایا لە یاریی داهاتوو دەبێت یان لە یاریی داهاتووتر. ئەو زۆر باشترە، ئەمەش ئێمە دڵنیا دەکاتەوە.

ئەرجەنتین، پاڵەوانی ئێستای جیهان، رۆژی شەممە لە کۆلێج ستەیشن لە ویلایەتی تێکساس رووبەڕووی هۆندوراس دەبێتەوە و رۆژی سێشەممەش لە ئۆبۆرن لە ویلایەتی ئالاباما بەرامبەر ئایسلەندا یاری دەکات.

تیمی پزیشکی هەڵبژاردەی نیشتمانی ئەرجەنتین هێشتا کارێکی زۆریان لەبەردەمدا ماوە بیکەن، سەرەتا لە سوپەرستارەکەیان،  لیۆنێل مێسی دەست پێدەکات، کە لە دوایین یاریی خۆیدا لەگەڵ ئینتەر مایامی لە قاچی چەپیدا تووشی پێکان بوو.

بەهۆی ئەم پێکانەوە، لە سەرەتادا چاوەڕوان نەدەکرا ئەم هێرشبەرە 38 ساڵانەیە بتوانێت لە بەرامبەر هۆندوراس یاری بکات.