گرێبەستەکەی نوێدەکاتەوە؛ کریستیانۆ رۆناڵدۆ دەبێتە خاوەنی یانەی نەسڕ
یاریگا –
کریستیانۆ رۆناڵدۆ گرێبەستەکەی نوێدەکاتەوە و دەبێتە خاوەنی بەشێک لە پشکەکانی یانە سعوودییەکە.
رۆژنامەی مارکای ئیسپانی ئاشکرایکردووە، کریستیانۆ رۆناڵدۆ بۆ ماوەی وەرزێکی دیکە گرێبەستەکەی لەگەڵ یانەی نەسڕی سعوودی نوێدەکاتەوە، کە بەگوێرەی گرێبەستە نوێیەکەی ساڵانە 183 ملیۆن یۆرۆ مووچە وەردەگرێت، واتە دۆن رۆژانە 550 هەزار یۆرۆ مووچەکەیەتی، کە سەرەتای ساڵی 2023 کریس پەیوەندی بە یانە سعوودییەکە کرد.
🤑🇸🇦 ¡¡Cristiano tendrá el contrato del siglo!! Un 5% del club, 550.000 al día…
✍️ Tiene los detalles @jfelixdiaz https://t.co/uOwD4TSyP4
— MARCA (@marca) January 15, 2025
رۆژنامە ئیسپانییەکە راشیگەیاندووە، سعوودییەکان بڕیاریان داوە کریستیانۆ رۆنالدۆ بکەنە خاوەنی بەشێک لە پشکەکانی یانەکە و ٪5ـی پشکەکانی یانەکە بە کریستیانۆ دەدەن، کە لە 84 یاری بە درێسی یانە سعوودییەکە 75 گۆڵ و 18 ئەسیستی کردووە.
کریستیانۆ رۆناڵدۆ کە مانگێکی دیکە تەمەنی دەبێتە 40 ساڵان، تاوەکو ئێستا وادەی وازهێنانی لە یاریکردن نادیارە و دەیەوێت بەردەوام بێت، لەکاتێکدا تاوەکو ئێستا نەیتوانیوە هیچ نازناوێکی گەورە لەگەڵ نەسڕ بەدەست بهێنێت، بەڵام سعوودییەکان وەکو ئامرازێک بۆ پێشخستنی تۆپی پێی وڵاتەکەیان هیوایان پێی هەیە، کە وەکو باڵیۆزی دۆسیەی میوانداریکردنی مۆندیالی 2034 دەستنیشانکراوە.
