یاریگا –
ئەنجامی دەنگەکانی سامی عەبدولیممام رۆژنامەنووسی عێراقی بۆ باڵۆن دۆری 2024 بڵاوکرایەوە، دەنگی یەکەمی بۆ باشترین یاریزانی جیهان لەسەر ئاستی پیاوان بۆ ڤینیسیۆس جونیۆر نەبووە.
سامی عەبدولئیمام رۆژنامەنووس و شرۆڤەکاری عێراقی ساڵانێکی زۆرە وەکو نوێنەری عێراق بەشداریی دەنگدانی گۆڤاری فڕانس فوتبۆڵ دەکات بۆ خەڵاتەکانی باڵۆن دۆر، بۆ ئەمساڵ دەنگی یەکەمی بۆ باشترین یاریزانی جیهان لەسەر ئاستی پیاوان بۆ رۆدری ناوەڕاستکاری ئیسپانی بووە کە خەڵاتەکەی بردەوە.
رۆژنامەنووسە عێراقییەکە بۆ باشترین راهێنەری پیاوان دەنگی بە کارلۆ ئەنچیلۆتی راهێنەری ریال مەدریدی ئیسپانی داوە و بۆ خەڵاتی کۆپا تایبەت بە باشترین یاریزانی لاو دەنگی بە لامین یامال داوە، کە هەردووکیان خەڵاتەکانیان بەدەستهێنا.
ئەنجامەکان ئاشکرابوون؛ رۆژنامەنووسی کامە وڵات دەنگیان بە ڤینیسیۆس جونیۆر نەداوە؟
ئەلفێردۆ ریلانۆ رۆژنامەنووسی ئیسپانی لە دەنگدان دەنگی یەکەمی بە ڤینیسیۆس جونیۆر یاریزانی ریال مەدرید دابوو، بەڵام زۆربەی وڵاتانی ئەوروپا و ئەمریکای لاتینی دەنگی یەکەمیان بە ڤینی نەداوە.
رۆژنامەنووسی وڵاتانی باشترین 100 هەڵبژاردەی جیهان بەگوێرەی ریزبەندیی فیفا مافی دەنگدانیان بۆ یەکلاکردنەوەی خەڵاتەکانی باڵۆن دۆر هەیە، ئێستا عێراق لە پلەی 56ـی ریزبەندی باشترین هەڵبژاردەکانی جیهان دێت، بۆیە مافی دەنگدانی هەبوو.
