ئیسپانیا

ڕیال مەدرید ٢-١ بارسێلۆنا:لۆس بلانکۆس پاڵەوانی سوپەر کەپ ـە

لە میانەی یاری گەڕانەوەی یاری فایناڵی جامی سوپەری ئیسپانیا،یانەی ڕیال مەدرید توانی تۆڵەی یاری چوون بکاتەوە و پێچەوانەی سێ یاری ڕابردوو ئاستێکی بەرزی پێشکەش کرد و توانی بە ئەنجامی دوو گۆڵ بەرامبەر گۆڵێک سەرکەوتن بەدەست بهێنێت.

هەر لە سەرەتایی گێمی یەکەمی یارییەکە لۆس بلانکۆس ڕاستەوخۆ دەستی بە هێڕشەکانی کرد بۆ سەر گۆڵی ڤیکتۆر ڤالدێز چونکە هیچی تری لەبەر دەستدا نەبوو بە هۆی دۆڕانی یاری چووندا بە ئەنجامی ٣-٢ لەسەر یاریگای کامپ نو.

یارییەکە بە ناوبژیوانیەتی ئانتۆنیۆ ماتیۆ لانۆز بەڕێوەچوو و تا ڕادەیەک توانی کۆنتڕۆلی یارییەکە بکات هەرچەندە دەمارگیری لە یارییەکەدا هەبوو و چەندین جار بەدی کرا.

سەرەتا یاریزان گۆنزالۆ هیگواین لە خوولەکی ١١ـدا گۆڵی یەکەمی بۆ ڕیال تۆمار کرد و جۆرێک لە شڵەژانی لە نێو یاریزانانی بارسا دروست کرد و ئەمەش بووە هۆکاری ئەوەی کریستیانۆ ڕۆنالدۆ گۆڵێکی تر زیاد بکات کاتێک لە خوولەکی ١٨ گۆڵی دووەمی تیمەکەی تۆمار کرد.

بە درێژایی گێمی یەکەم مەدرید کۆنتڕۆلی یارییەکەی کرد وە دەرکرانی یاریزان ئادریانۆ کۆریا بە کارتی سوور یەکێک بوو لە هۆکارەکان،بەڵام لە دوا پێنج خوولەکی گێمی یەکەم بارسا دەستی کرد بە هێڕش کردنە سەر گۆڵی بەرامبەر و ئەستێرە لیۆنێل مێسی توانی لە ڕێگەی لێدانێکی ڕاستەوخۆـوە گۆڵێکی زۆر جوان تۆمار بکات.

لە گێمی دووەمدا بارسا بە شێوەیەکی نیمچە تەواو کۆنتڕۆلی یارییەکەی کرد بە هۆی گەڕانەوەی یاریزانانی مەدرید بۆ دواوە و پشت بەستنیان بە هێڕشی پێچەوانە بۆ پارێزگاری کردن لە ئەنجامی یارییەکە و لە کۆتاییدا بەو ئەنجامە بە کۆتایی هات.

جێگەی ئاماژە پێدانە ئەمە نۆیەم جارە مەدرید ئەم نازناوە بەدەست بهێنێت،کەچی بارسا ١٠ جار ئەم نازناوەی بەدەست هێناوە.

کۆمێنتێکی نوێ دابنێ

کۆمێنتەکان

تاگ

بابەتی پەیوەندیدار

Back to top button
Close