یاریگا
هەڵبژاردەی باسکەی ئەڵمانیا دوای بردنەوەی لە ئەمریکا و گەیشتن بە یاریی کۆتایی مۆندیالی 2023، توانی لە سڕبیاش بباتەوە.
ئەڵمانیەکان لە قۆناغی پێشکۆتایی مۆندیالی باسکە توانیان بە جیاوازی 2 خاڵ لە یەکێک لە هەڵبژاردە گەورەکانی جیهان کە ئەمریکا بوو ببەنەوە و بلیتی یاریی کۆتاییان بەدەستهێنا.
ئەمڕۆ مانشافت لە یاریی کۆتایی پاڵەوانتیەکە و لە پێناو بەدەستهێنانی ناسناوی مۆندیالی باسکە بۆ جاری یەکەم لە مێژوودا، رووبەڕووی هەڵبژاردەی سڕبیا بونەوە.
چارەکی یەکەمی یارییەکە یاریزانانی سڕبیا باڵا دەست بوون و توانیان بە ئەنجامی 26-23 ئەم چارەکە لە بەرژەوەندی خۆیان یەکلایی بکەنەوە و هاندەرەکانی هەڵبژاردەکەشیان گەشبین کرد بۆ بردنەوەی یارییەکە.
چارەکی دووەم یاریزانانی ئەڵمانیا باشتر دەرکەوتن و توانیان قەرەبووی چارەکی یەکەم بکەنەوە و لە کۆتاییدا ئەم چارەکەیان بە ئەنجامی 24-21 لە سڕبیا بردەوە و ئەنجامی گشتی هەردوو چارەکیش بە ئەنجامی 47-47 بۆ هەردوولا یەکسانبوو.
چارەکی سێیەم ئەڵمانیەکان زۆر باشتربوون و ئەم چارەکەیان بە جیاوازی 12 خاڵ واتە بە ئەنجامی 22-10 لە سڕبیا بردەوە، هەر ئەم چارەکەش بووە هۆی بردنەوەیان.
لە چارەکی کۆتایی و یەکلاکەرەوە یاریزانانی سڕبیا توانیان ئەمجارە بە ئەنجامی 20-14 لە ئەڵمانیەکان ببەنەوە، بەڵام بەهۆی جیاوازیە زۆرەکەی چارەکی سێیەم، نەیانتوانی قەرەبوو بکەنەوە.
لە کۆتاییدا هەڵبژاردەی ئەڵمانیا توانی یارییەکە بە ئەنجامی 83-77 لە سڕبیا بباتەوە و بێ ئەوەی تووشی هیچ دۆڕانێک بن، بۆ جاری یەکەم لە مێژوودا ناسناوی مۆندیالی باسکەیان بردەوە.
