کێشەی ریال مەدرید و ئێمباپێ چییە؟
یاریگا –
ریال مەدرید دەیەوێت گرێبەستی گرانبەها لە هاوینی داهاتوودا بکات، بەڵام پێشینە تەنیا بە واژۆکردنی گرێبەست لەگەڵ جود بێڵینگهام، یاریزانی بۆڕووسی دۆرتموند دراوە.
رۆژنامەی مارکا بڵاویکردووەتەوە، ریال مەدرید نیازی نییە گفتوگۆ لەگەڵ نوێنەرانی کیلیان ئێمباپێ و بەرپرسانی پاریس سانجێرمان بکات، بەڵکو سەرنجی تەواوی لەسەر بێڵینگهام داناوە و نایەوێت کات بەفیڕۆ بدات.
رۆژنامەکە لە زاری بەرپرسێکی دەستەی کارگێڕی ریال مەدرید بڵاویکردووەتەوە، دەنگۆکانی چوونە دەرەوەی ئێمباپێ لە پاریس سانجێرمان لەڕێگەی هاوڕێ و کەسە نزیکەکان بە کارگێڕی مەدرید گەیشتووەم، بەڵام بڕوای تەواویان پێ نییە و پێیان وایە، راستگۆیی لەو بابەتەدا نییە.
ریال مەدرید لە هاوینی رابردوودا هەوڵی زۆری بۆ گواستنەوەی ئێمباپێ دا، تەنانەت یاریزانەکە چەندین جار باسی لە جێهێشتنی پاریس سانجێرمان کرد، بەڵام لە کۆتاییدا بە گرێبەستێکی گەورە، لە پاریس مایەوە.
ریال مەدرید دەیەوێت کێشەی هێرشبەری چارەسەر بکات و وەک هەنگاوی یەکەم، ئالڤارۆ رۆدریگێز زیاتر دەباتە پێش و بیر لە گۆڕینی شێوازی یاریکردنی رۆدریگۆ دەکاتەوە، بۆ ئەوەی وەک سەرەڕم یاری بکات.
کارگێڕی یانە مەدریدییەکە رەزامەندی لەسەر درێژکردنەوەی گرێبەستی ناچۆ، تۆنی کروس، کەریم بێنزێما و مارکۆ ئاسێنسیۆ داوە، ئێستاش خەریکی یەکلاییکردنەوەی دۆخی دانی سێبایۆس و لوکا مۆدریچن، کە لە هاوینی داهاتوو گرێبەستەکانیان بەسەر دەچێت.
