یاریگا–
کارلۆ ئانچێلۆتی، راهێنەری ئیتاڵی یانەی ریال مەدریدی ئیسپانیا چاوەڕێ دەکرێت دوای کۆتایی هاتنی پشووەکانی سەری ساڵ، سەرجەم یاریزانەکانی کە پێکان و کۆرۆنایان هەبوو بگەڕێنەوە و بەردەست بن.
کەناڵی GOLـی ئیسپانی بڵاویکردەوە، دواجار ئاسێنسیۆ ناوەڕاستکاری شاهانەکانیش ڤایرۆسی کۆرۆنای تێپەڕاندووە و بەم زووانە ئەو یاریزانەش بەشداری راهێنانەکانی یانەکەی دەکاتەوە، بەم شێوەیە سەرجەم ئەو یاریزانەی کە تووشی کۆرۆنا بوون پەتاکەیان تێپەڕاند و چاوەڕێ دەکرێت سەرجەم یاریزانەکانی ئەو یانەیە دوای پشووەکانی سەری ساڵ بەشداری راهێنانەکانی یانەکەیان بکەن.
یانەی ریال مەدرید لە قۆناخی یەکەمی لالیگا بە کۆکردنەوەی 46 خاڵ توانی پلەی یەکەم بەدەست بێنێت، ئەو یانەیە لە یەکەم یاری ساڵی نوێ و لە گەڕی نۆزدەی خولەکە، رووبەڕووی خیتافی دەبێتەوە.
