یاریگا–
ڤینیسیۆس جونیۆر، یاریزانی هەڵبژاردەی بەڕازیل و یانەی ریال مەدریدی ئیسپانیا دوای بانگهێشتکردنی بۆ ریزەکانی هەڵبژاردەی یەکەمی وڵاتەکەی و بەشداری کردن لە کۆپا ئەمریکای 2021 ئەمجارەیان بانگهێشتی هەڵبژاردەی ئۆڵمپی وڵاتەکەی دەکرێت.
فێدراسیۆنی تۆپی پێ بەڕازیل ماوەیەک لەمەوبەر لیستی ناوی یاریزانە بانگهێشتکراوەکانی بۆ ئۆڵمپیکی تۆکیۆ بڵاوکردەوە، بەڵام ئەو کات یاریزانەکەی شایانەکان ناوی لە لیستەکە نەبوو، هۆکارەکەش ئەوەبوو یانەکەی مۆڵەتی پێنەدا بەشداری ئەو یارییانە بکات، بەڵام دوای پێداگیری بەڕازیلیەکان کە داوایان کردبوو لە نێوان ئەو یاریزانە و رۆدریگۆ پێویستە یەکێکیان لەگەڵ هەڵبژاردەی ئۆڵمپی بێت، دواجار یانە ئیسپانیەکە رێگەی بە یاریزانەکەدا بەشداری ئۆڵمپیک بکرێت.
دوای یەکلایی بونەوەی ئەم هەوڵانە، ڤینیسیۆس جۆنیۆر لە تۆڕی کۆمەڵایەتی ئینستاگرام پۆستێکی بڵاوکردووەتەوە و خۆشحاڵی خۆی بە بانگهێشتکردنی بۆ هەڵبژاردەی ئۆڵمپی وڵاتەکەی دەربڕیوە.
