هەنگاوی دواتر جێهێشتنی یاریگا دەبێت؛ چوامینی باسی ڤینیسیۆس دەکات

یاریگا –

ناوەڕاستکارەکەی ریال مەدرید باس لەوە دەکات چۆن بەسەر یەکێک لە سەختترین قۆناخەکانی کاروانی وەرزشیی لە یانەکەدا زاڵ بوو.

چوامینی کە بەهۆی سڕکردنەوە یاریی گەڕانەوەی چامپیۆنزلیگی لە ئالیانز ئارێنا لەدەستدا، یەکێک بووە لە یاریزانە هەرە گرنگەکانی ریال مەدرید لەم وەرزەدا. بەڵام کاتێکی هێندە نابێت کە لە سانتیاگۆ بێرنابیۆ بەهۆی ئاستە نزمەکەیەوە رووبەڕووی رەخنەی توند و تەنانەت فیکەی ناڕەزایەتی هاندەران بووەوە.

لە چاوپێکەوتنێکدا لەگەڵ Pivot Podcast، تیشکی خستەسەر ئەو قۆناخە سەختە و گوتی:

من کرابوومە قوربانی. لە 10 بۆ 20 خولەکی یەکەمدا هەر کاتێک تۆپ دەهاتە لام تەواوی یاریگاکە فیکەی ناڕەزایەتی بۆ لێدەدام. ئەو دۆخە یان تێکت دەشکێنێت، یان وات لێدەکات لەبەر خۆتەوە بڵێیت کە ‘شتەکان بەو جۆرەن، با بزانین دەتوانم چی کۆنتڕۆڵ بکەم’، تاکە شتێکیش کە بتوانم کۆنتڕۆڵی بکەم ئاستی یاریکردنمە. ئاستی فشار لە ریال مەدرید جیاوازە. خەڵکی باسی هەموو شتێک دەکەن کە دەیکەیت، چ باش بێت یان خراپ.

هەروەها روونی کردەوە چۆن ئەو ئەزموونە لە رووی ئەقڵییەتەوە یارمەتیداوە:

هەمووان باسی من و شێوازی یاریکردنمیان دەکرد. یەک دوو ساڵ لەمەوبەر من یاریزانێکی خراپ بووم و لەنێو یاریگادا فیکەم بۆ لێدەدرا، بۆیە هەستم کرد بە زۆر شتدا تێپەڕیم و بێگومان ئەوە لە رووی ئەقڵییەتەوە یارمەتیدام. ئێستا دەزانم هەرچییەک بکەم خەڵکی قسەی لەسەر دەکەن، بۆیە سەرنجی نادەم. یاریکردن بۆ ریال مەدرید گەورەترین شانۆیە لە وەرزشدا؛ فشار لای من مافێکی تایبەتییە.

چوامینی باسی لە بابەتێکی مەترسیداری وەکوو رەگەزپەرستیش کرد و ئاماژەی بە رووداوێکی پەیوەست بە ڤینیسیۆسدا:

پێیان گوت مەیموون. هەست دەکەم هەنگاوی داهاتوو جێهێشتنی یاریگا دەبێت. رێگە نادەین ئەو دیمەنانە دووبارە ببنەوە.

ئەم قسانەی چوامینی هەم گەشەکردنی کەسایەتیی ئەو لەژێر فشاردا نیشان دەدەن، هەم هەڵوێستی توندی تیمەکە دژی رەگەزپەرستی لە تۆپی پێدا دووپات دەکەنەوە.