یاریگا–
هەرسێ یانەی ریال مەدرید، بارسێلۆنا و یۆڤێنتۆس کە بنیانتەری سەرەکی سوپەر لیگی ئەوروپانە، لەو کاتەوەی ئەو پرۆژەیان راگەیاندووە بەردەوام لەلایەن یوێفا هەڕەشەیان لێدەکرێت، بەڵام دادگایەکی ئەوروپا ئەو هەڕەشانە رەتدەکاتەوە.
رادیۆی کادێنا سیری ئیسپانیا زانیاری دەستکەوتووە، دوای هەڕەشەکانی یوێفا بە دوورخستنەوەی ئەو سێ یانەیە لە چاومپیۆنزلیگی وەرزی داهاتوو، ئەو سێ یانەیە رێکاری یاساییان گرتە بەر و سکاڵایەکیان لە دژی ئەو فێدراسیۆنە تۆمار کرد، ئێستاش دادگای دادی سویسڕا هۆشداری داوەتە فێدراسیۆنی تۆپی پێ ئەوروپا کە بۆیان نیە سزای ئەو سێ یانەیە بدەن و دەتوانن بە رێگەی دیکە گفتوگۆیان لەگەڵدا بکەن.
سەرەتای راگەیاندنی سوپەر لیگی ئەوروپا 12 یانە بەشداربوون، بەڵام لە کۆتاییدا بەهۆی هەڕەشەکانی یوێفا و فیفا نۆ یانە لە پرۆژەکە کشانەوە و تاوەکو ئێستاش تەنها هەرسێ یانەی ریال مەدرید، بارسێلۆنا و یۆڤێنتۆس پێداگیرن لەسەر کردنەوەی ئەو خولە.
